8 de marzo MULLERES EN FOLGA

A CIG convoca folga de mulleres de 24 horas o vindeiro 8 de marzo de 2021, no Día internacional das mulleres traballadoras.  Sobran razóns para que as mulleres fagamos folga este 8-M, para facérmonos visíbeis na rúa, para reivindicarmos os nosos dereitos, para non darmos nin un só paso atrás na nosa loita. Fagamos ouvidos xordos ás voces que mesmo insinuaron que fomos culpábeis da pandemia, ou das que consideran que nunca é o momento axeitado para facérmonos valer. ÚNETE A NÓS!

[Click para +información]


A CIG rexistra a convocatoria de Folga de Mulleres para o 8 de Marzo

A central fai un chamamento ás traballadoras a secundar o paro de 24 horas e a participar nas mobilizacións convocadas nesa xornada

Nacional -

A CIG formalizou este mércores no rexistro telemático da Consellaría de Emprego e Igualdade a convocatoria da Folga de Mulleres do 8 de Marzo, Día Internacional das Mulleres Traballadoras, no marco dunha xornada internacional de paros e mobilizacións para reivindicar a igualdade de oportunidades entre mulleres e homes nas condicións de traballo, na esfera social e o dereito a vivir sen violencia. A folga de 24 horas afectará a todas as actividades e a todos os centros de traballo de Galiza, tanto no sector público como privado.



Condenan o Concello de Mugardos por vulnerar o dereito á folga de dúas traballadoras o 8 de Marzo

A sentenza obriga a Administración local a indemnizar as empregadas

Mugardos -

O Xulgado do Social número 2 Ferrol vén de condenar o Concello de Mugardos por vulnerar os dereitos fundamentais de dúas traballadoras durante a folga de mulleres do pasado 8 de Marzo. O xulgado recoñece que Administración vulnerou o dereito á folga destas empregadas ao obrigalas a acudir aos postos de traballo malia non estar incluídas nos servizos mínimos e condena o Concello a abonarlle unha indemnización a cada unha de mil euros por danos e prexuízos.



O feminismo galego desborda as rúas do país nunha xornada histórica de folga de mulleres

A CIG esixe unha resposta contundente, inmediata e eficaz dos gobernos fronte ao machismo

Nacional -

A secretaria das Mulleres da CIG, Margarida Corral, cualificou este 8 de Marzo dunha “xornada histórica aínda maior que a do ano pasado” mais advertiu que “non pode quedar en saco roto”, esixindo que “dunha vez por todas os gobernos deben acometer reformas legais e sociais dirixidas a rematar, dunha vez por todas, co machismo que está tan arraigado nas institucións".



Milleiros de mulleres secundan a folga e as mobilizacións convocadas pola CIG neste 8 de Marzo

"O poder ten que entender que non imos permitir retrocesos nos nosos dereitos cando aínda nos quedan moitos por conquistar"

Nacional -

Miles de galegas están a secundar a folga e as preto de 30 mobilizacións convocadas pola CIG ao longo de toda Galiza neste 8 de Marzo, para reclamar a igualdade de oportunidades nas condicións de traballo, na esfera social e o dereito a vivir sen violencia. No Día Internacional da Muller Traballadora, as galegas toman as rúas de novo, reivindicando a orixe obreira e revolucionaria desta data, "para que dunha vez por todas o poder entenda que as mulleres estamos fartas da desigualdade e das agresións que sufrimos e porque non imos permitir que nos fagan retroceder nos nosos dereitos cando aínda nos quedan moitos por conquistar".

Galiza enteira treme: da Mariña ao Morrazo, da Costa da Morte a Valdeorras, de Ferrolterra a Compostela, de Lugo a Ourense, do Salnés a Betanzos, da Coruña a Vigo... miles de mulleres traballadoras da sanidade, do ensino, do comercio, da industria, dos centros de chamadas, da administración, do téxtil, do mar, das conserveiras,... saíron hoxe coa CIG á rúa no marco da xornada de folga laboral; mais tamén o fixeron as xubiladas, as estudantes, as desempregadas, as mulleres que traballan arreo pero non teñen unha remuneración "para denunciar a inxustiza que supón discriminar a máis da metade da sociedade pole mero feito de sermos mulleres".



A folga ten unha importante incidencia, especialmente nos sectores máis feminizados da área pública

Corral: "Non imos permitir máis conmemoración hipócritas e baleiras de contido, facemos folga para que o poder entenda que non imos de farol"

Nacional -

Miles de galegas están a secundar a folga convocada pola CIG neste 8 de Marzo, Día Internacional da Muller Traballadora, para reivindicar a igualdade de oportunidades nas condicións de traballo, na esfera social e o dereito a vivir sen violencia. Pero hai que lembrar que esta é unha folga que traspasa o ámbito laboral, afectando ao ensino (onde se agarda un seguimento masivo da folga por parte das estudantes), ao consumo e aos coidados.



Os datos de seguimento na quenda de noite avanzan que a folga será un éxito

En empresas como Denso, Plastic Omnium ou Einsa secúndana o 90% das traballadoras

Nacional -

Todo apunta a que este 8 de Marzo "vai ser todo un éxito e que as mulleres volveremos situar Galiza á cabeza do mapa do Paro Internacional de Mulleres". Os datos que se manexan a esta hora de respaldo á folga, avanzan que estamos ás portadas doutra xornada histórica coas mulleres como protagonistas absolutas.



A CIG denuncia o afán de empresas e institucións por limitar o dereito á folga o 8M

A Secretaría das Mulleres chama a responder coa folga e nas rúas estes intentos de boicot

Nacional -

A Secretaría das Mulleres da CIG denuncia que hai empresas e institucións, como a propia Xunta de Galiza ou o concello de Betanzos, que están tratando de pór atrancos á folga de mulleres convocada para este 8M. Lembra que é un dereito fundamental e sinala que xa hai denuncias presentadas na Inspección de Traballo por este motivo.



Denuncian o intento do hospital Povisa de boicotear a folga de mulleres

A CIG trasládalle á Inspección de Traballo que o centro vigués aínda non comunicou os servizos mínimos

Vigo -

A poucas horas de que dea comezo a folga de mulleres de 24 horas convocada con motivo do 8 de Marzo, Día Internacional da Muller Traballadora, o hospital Povisa de Vigo aínda non fixo públicos os servizos mínimos que rexerán durante a xornada. Dende a CIG denuncian que se trata dun claro intento da dirección de boicotear o paro, polo que lle trasladaron o caso á Inspección de Traballo para que se garanta un dereito fundamental como o de folga.



A CIG convoca preto de 30 mobilizacións este 8-M

A central denuncia as actuacións dalgunhas empresas para impedir o exercicio do dereito á folga das traballadoras

Nacional -

Este 8 de Marzo, no marco do Paro Internacional de Mulleres, a CIG ten convocada folga de mulleres para reivindicar a igualdade de oportunidades nas condicións de traballo, na esfera social e o dereito a vivir sen violencia. A folga laboral afectará a todas as actividades e centros de traballo, tanto das empresas privadas como do sector público, con vínculo funcionarial, estatutario ou laboral, no ámbito territorial da Galiza, dende ás 00:00 horas ás 24:00 horas (agás para as quendas que se inicien antes das 00:00 horas).



A CIG solicita a suspensión cautelar dos “abusivos” servizos mínimos decretados pola Xunta de Galiza

Denuncia que pretenden neutralizar os efectos da folga de mulleres

Nacional -

A CIG solicitou a suspensión cautelar dos servizos mínimos establecidos pola Xunta de Galiza para a folga xeral de mulleres convocada para o día 8 de marzo por “abusivos e contrarios ao dereito fundamental de folga”. Entende que procuran neutralizar os seus efectos “mediante a asignación duns recursos de tempo e persoal absolutamente desproporcionados” e que se fixan “sen cumprir os estritos requisitos de motivación sobre a necesidade de tales servizos”.



HORARIOS