Non existen artigos de novas actualmente.

Últimas novas


A VIII Asemblea da CIG de Vigo reelixe a Alberto Gonçalves Herrero como secretario comarcal

No proceso tamén se escolleron a nova Executiva e os representantes da bisbarra no Consello Confederal

Vigo -

Alberto Gonçalves Herrero foi reelixido hoxe secretario comarcal pola VIII Asemblea da CIG de Vigo con 185 votos a favor, 8 en branco e 2 nulos, mentres que a nova Executiva que dirixirá a central sindical na bisbarra os vindeiros catro anos obtivo 187 votos a favor, 6 en branco e 2 nulos. No proceso, ao que concorreu unha única lista de consenso e que se celebrou no Centro Veciñal e Cultural de Valadares baixo o lema 'Sen loita non hai futuro! Polo dereito ao traballo digno na propia terra, tamén se escolleron os representantes da comarca no Consello Confederal (186 votos a favor, 6 en branco e 3 nulos). O secretario xeral da CIG, Paulo Carril, que tomou a palabra no acto de clausura, chamou a fortalecer e a espallar entre a clase traballadora galega o sindicalismo de confrontación que representa a central.



Xabier Filgueira, reelixido secretario comarcal pola VIII Asemblea da CIG da Coruña

No proceso escolleuse a nova Executiva e demandouse un plan comarcal de industria e emprego

A Coruña -

O Pazo de Exposicións da Coruña acolleu este sábado a VIII Asemblea Comarcal da CIG da Coruña que reelixiu a Xabier Filgueira Domínguez como secretario comarcal, con 151 votos a favor, 2 brancos e 0 nulos. No proceso, ao que concorreu unha única candidatura unitaria e que se desenvolveu baixo o lema "A forza para avanzar. Sindicalismo nacionalista e de clase", tamén se escolleu a nova Executiva Comarcal e as persoas que representarán á comarca no Consello Confederal. O acto tamén contou coa participación do secretario xeral da CIG, Paulo Carril, que foi o encargado de inaugurar asemblea.



A VIII Asemblea da CIG de Lugo-A Mariña reelixe a Antonio Niño como secretario comarcal

No proceso tamén se escolleu a nova Executiva Comarcal

Lugo -

A VIII Asemblea Comarcal da CIG de Lugo-A Mariña reelixía este sábado a Antonio Niño como secretario comarcal por 128 votos a favor, 1 branco e 1 nulo. No proceso, ao que se presentou unha candidatura unitaria, tamén se escolleu a nova Executiva Comarcal e as persoas que representarán a comarca no Consello Confederal. A asemblea, na que participaron 130 delegados e delegadas, tivo lugar no Auditorio Gustavo Freire baixo o lema "Forza para avanzar".



Manel Grandal Anca, reelixido secretario comarcal na VIII Asemblea comarcal de Ferrol

Renovouse a executiva e elixíronse ás persoas que representarán á comarca no Consello Confederal

Ferrol -

A VIII Asemblea comarcal da CIG de Ferrol renovou a súa executiva e elixiu a Manel Grandal Anca como secretario comarcal con 91 votos a favor, 5 brancos e 5 nulos. Unha nova dirección que terá que afrontar a problemática laboral, económica e social que arrastra a comarca de Ferrolterra desde hai décadas, agravada pola pandemia e polo proceso de desindustrialización, coa crise do sector naval, o peche de Endesa e o peche e deslocalización de GAMESA ou POLIGAL, entre moitas outras. Situación da que Grandal responsabilizou aos goberno galego e do Estado.



A VIII Asemblea da CIG de Pontevedra reelixe por unanimidade a Marcos Conde secretario comarcal

O Informe da Executiva destaca que a central revalidase a posición de primeira forza na bisbarra

Pontevedra -

Marcos Conde Farto será o encargado de dirixir de novo a CIG de Pontevedra durante os próximos catro despois de que a VIII Asemblea Comarcal celebrada este sábado 16 o reelixise como secretario comarcal con 127 votos a favor, ningún en contra e ningunha abstención. Mentres que a candidatura de consenso para a Executiva Comarcal, que abría Conde, obtivo 127 apoios, ningún en contra e ningunha abstención; e a lista de representantes da bisbarra no Consello Confederal saíu adiante con 124 votos a favor, ningún en contra e ningunha abstención. No acto celebrado na Finca Bataco rendéuselle homenaxe a históricos/as sindicalistas recentemente xubilados/as ou que se van xubilar nos vindeiros catro anos.



Anxo Pérez Carballo, reelixido secretario comarcal pola VIII Asemblea da CIG de Ourense

O Informe da Executiva salienta o aumento da afiliación e a mellora organizativa nos últimos catro anos

Ourense -

A VII Asemblea da CIG de Ourense que tivo lugar este sábado 16 reelixiu a Anxo Pérez Carballo como novo secretario comarcal con 94 votos a favor, 16 en branco e 3 nulos. Ao proceso asembleario concorreu unha candidatura unitaria para a Executiva Comarcal, encabezada por Pérez Carballo, que logrou 107 votos a favor, 5 en branco e 1 nulo; a lista para o Consello Confederal sumou 103 votos a favor, 13 en branco e ningún nulo. No acto celebrado en Expourense gardouse un minuto de silencio en memoria de Etelvino Blanco, quen estivo á fronte da central na bisbarra dende a súa creación en 1994.


Carril chama a fortalecer a CIG para consolidar o sindicato como “Forza para Avanzar”

Considera imprescindíbel o rearme organizativo e ideolóxico para combater a ofensiva neoliberal

Nacional -

»Accede aquí aos vídeos do VIII Congreso

Paulo Carril, na súa condición de reelixido secretario xeral, pechou o Congreso cunha intervención na que salientou os tres principais obxectivos da CIG de cara aos próximos catro anos: consolidar o sindicato como primeira forza sindical en representatividade, afiliación e capacidade de mobilización; reforzar a organización e ser referentes do feminismo de clase para transformar a realidade; e afondar na loita pola soberanía nacional de Galiza, afianzando o compromiso da central sindical co movemento nacionalista galego do que fai parte.


O VIII Congreso da CIG elixe a nova Executiva Confederal e a Paulo Carril como secretario xeral

Carril aposta por consolidar a CIG como primeira forza, ser referentes do feminismo de clase e reforzar a loita pola soberanía nacional

Nacional -

» Accede aquí aos vídeos do VIII Congreso

A CIG celebrou hoxe o seu VIII Congreso, o primeiro como a forza sindical con máis representación en Galiza, como xa o era en afiliación e en capacidade de mobilización. Unha xornada de debate na que, baixo o lema "Forza para Avanzar", máis de 600 delegados e delegadas actualizaron o modelo de organización e definiron as liñas de acción sindical que guiarán o traballo a desenvolver nos vindeiros catro anos. O VIII Congreso reelixiu ademais a Paulo Carril como secretario xeral, que recibiu 464 votos a favor, 35 en branco e 7 nulos e renovou a súa Executiva confederal que foi respaldada por 477 votos a favor, 29 en branco e 3 nulos.



O Relatorio de Acción Sindical sae adiante con 408 votos a favor, 2 en contra e 6 abstencións

Insta a loitar por unha saída galega xusta da crise, un marco propio de relacións laborais e a soberanía nacional

Nacional -

A sesión da tarde do VIII Congreso Confederal arrancaba co debate e a votación do Relatorio de Acción Sindical no que se marcas as principais liñas de actuación do sindicato para os vindeiros catro anos, cun obxectivo central: avanzar nunha saída galega xusta da crise. O documento, aprobado con 406 votos a favor, 2 en contra e 6 abstencións, contempla un ambicioso plan de medidas alternativas para a recuperación económica, a industrialización e a creación de emprego digno en Galiza, coas que superar as políticas neoliberais que nos viñeron aplicando e que esixen a combinación de actuacións de urxencia con propostas a longo prazo e de carácter estratéxico.



Aprobado o relatorio de Organización con 405 votos a favor, 0 en contra e 3 abstencións

Aposta polo modelo combativo e de contrapoder que levou á CIG a ser a primeira forza sindical en Galiza

Nacional -

O pleno do Congreso da CIG vén de aprobar con 405 votos a favor, 0 en contra e 3 abstencións, o Relatorio de Organización e Estatutos. Un documento que salienta o papel da CIG como “instrumento útil e capaz, de contrapoder real fronte á explotación de clase”, que foi o que levou á central sindical a ser hoxe primeira forza en representatividade en Galiza.