As diferentes Iniciativas Lexislativas Populares promovidas pola CIG: Proposta para unha Tarifa Eléctrica Galega, de Medidas para a Xestión Pública dos Saltos e Aproveitamentos Hidroeléctricos de Galiza e Proposición para a protección e mellora dos hábitats do bosque autóctono, a racionalización da xestión do monte e a loita contra incendios forestais. Así mesmo das reivindicacións contidas no Manifesto por un Monte Galego con Futuro.

Creación dunha Empresa Pública Galega de Electricidade que xestione as centrais hidroeléctricas cuxa concesión vaia vencendo e, tamén, controle as participacións accionariais que ten a Xunta noutras empresas enerxéticas.

Por unha Estratexia de Transición Xusta en Galiza, que debera dar solución inmediata nas seguintes direccións:

• Inclusión de Galiza no Plan de Acción Urxente para Países do Carbón e Centrais Pechadas 2019-2021 (Estratexia de Transición) en igualdade de condicións que Aragón, Asturies e Castela- León.

• Aprobación e subscrición inmediata dos Convenios de Transición Xusta para As Pontes e Cerceda (Meirama) cun calendario definido de financiamento e accións a realizar ante o impacto por peche e reconversións das centrais térmicas de carbón para o mantemento do emprego e a industria.

• Solucións para a continuidade do emprego nestas comarcas, de forma especial na industria auxiliar.

• Impulso das tecnoloxías de almacenamento de enerxía (hidróxeno verde, baterías etc.), nas proximidades das centrais térmicas, aproveitando a súa capacidade de evacuación eléctrica.

• A asignación de novas instalacións de produción de enerxía renovábeis que se implanten, así como o aceso prioritario de parte ou totalidade da capacidade de evacuación eléctrica das concesións que queden extinguidas polo peche das centrais térmicas, deberán incluír nas convocatorias, ademais dos requisitos técnicos e económicos, outros, tendo de referencia o Decreto 242/2007 da Consellaría de Innovación e Industria da Xunta de Galiza, como son:

◦ criterios ambientais e sociais.

◦ proxectos de desenvolvemento económico ou plans industriais asociados propostos para a súa implantación nos territorios afectados.

◦ compromisos adicionais de participación pública no capital social do proxecto, segundo as fórmulas estabelecidas na disposición proposta de referencia.

• A implantación de parques eólicos e das súas liñas de evacuación obriga a unha modificación da lexislación para que os/as propietarios/as do monte e das terras afectadas teñan capacidade de negociación coas promotoras dos parques eólicos.

Aprobación do Estatuto de Empresas Electrointensivas de acordo á Proposta para a Industria Electrointensiva presentada pola CIG no mes de outubro de 2018.

• Propostas para o sector da automoción, que demanda a aprobación dun Plan de Transición ante o proceso de descarbonización, coa participación de todas as organizacións sindicais que teñen a consideración legal de máis representativas (de acordo aos artigos 6 e 7 da LOLS) e máis axentes sociais, a fin de abordar un plano de investimento das administracións públicas, que recolla medidas de apoio ao I+D+I no sector para o impulso dos coches híbridos, eléctricos, autónomos, formación dos cadros de persoal cara ao novo sistema de fabricación, plan de rexuvenecemento dos cadros de persoal, de estabilidade e dignificación das condicións de traballo. Promoverase a optimización dos procesos produtivos, pulando polo aproveitamento das sinerxías entre as factorías principais e a súa industria secundaria.

• Creación dunha Mesa Galega da Automoción (MGA), integrada polo actual clúster empresarial (CEAGA), as centrais sindicais e as tres universidades galegas.

Transición xa no sector dos carburantes e biocarburantes, encamiñado á transformación das refinerías en biorefinerías, a transición cara aos biocombustíbeis de segunda xeración, con materias primas sostíbeis e buscando as sinerxías con outras industrias coa elaboración de subprodutos. E, por último, apostando polos biocombustíbeis como combustíbel de transición na mobilidade até que se alcancen os obxectivos marcados para a mobilidade eléctrica.

Reformar a Lei de Residuos Sólidos Urbanos para adaptala ás nosas necesidades, que aposte decididamente polo rexeitamento á incineración e se centre en minimizar a produción dos residuos, na súa reutilización e reciclaxe.

Promoción da mobilidade de persoas e mercadorías sen emisións, coa aprobación dun calendario para o desenvolvemento e mellora das infraestruturas e as comunicacións das persoas e do transporte de mercadorías que contribúa aos obxectivos xerais de redución de emisións:

• Nos ámbitos urbanos e interurbanos (incluído o rural) do transporte público por estrada, ferroviario de proximidade (e liña do FEVE no norte de Galiza) e por vía marítima, priorizando a súa complementariedade a todos os niveis, así como aeroportuario.

• Elaboración dun plano que faga real un sistema aeroportuario galego, a partir da cooperación e complementariedade dos tres aeroportos, potenciando o aeroporto de Santiago de Compostela como aeroporto da capital de Galiza, ampliando e potenciando o seu carácter internacional.

• Reformulación do ente público, Portos de Galiza para unha potenciación conxunta e real dos cinco portos principais (Vigo, A Coruña, Ferrol, Marín e Vilagarcía) para a captación de tránsitos no exterior, evitando a competencia entre eles e fomentando a complementariedade. Así mesmo, resolución da conexión ferroviaria dos portos exteriores da Coruña e Ferrol.

• Incluír Galiza na "rede básica " do corredor atlántico ferroviario, co itinerario A Coruña-Vigo-Ourense-León. Así mesmo, resolver a conexión directa A Coruña- Xixón-Bilbao.

• Incorporar a conexión ferroviaria Vigo-Porto na rede básica do corredor atlántico.

• Incorporar o porto de Vigo como porto nodal formando parte da rede básica.

Plan de inversión pública na construción, nas infraestruturas e nas telecomunicacións, para un desenvolvemento sostíbel, superando o modelo do financiamento privado con contrato de concesión, para abordar as propostas referidas á mobilidade que relacionamos no apartado anterior até todas aquelas medidas de:

• apoio á rehabilitación de vivendas con medidas como o apoio a eficiencia enerxética, utilización de enerxías renovábeis, conservación de fachadas e acondicionamento dos cascos antigos.

• promoción do uso de materiais autóctonos na construción e rehabilitación de vivendas privadas e edificacións públicas.

• desenvolvemento dun plan especial para a mellora nas telecomunicacións e aceso ás novas tecnoloxías en todos os ámbitos, con especial preocupación no rural.

• tratamento e saneamento das augas residuais.

• finalización da rede viaria galega que permita a conexión de todas as cidades galegas coa capital de Galiza por autoestradas e autovías libre de peaxe. Plan para a conservación e mellora na seguridade viaria nas principais estradas e vías de comunicación galegas.

• construción de itinerarios preferentes para o transporte público e de carril bici nos núcleos de poboación de máis de 20.000 habitantes.

Minaría sustentábel e recuperación dos espazos naturais, a través da aplicación e desenvolvemento íntegro da Lei 3/2008, de ordenación da minaría de Galiza, para que permita:

• Actuacións baseadas en criterios de estabilidade e sostibilidade, cumprindo os requisitos ambientais e peche dos ciclos produtivos, imposibilitando proxectos claramente colonialistas e depredadores.

• Melloras na comercialización e posta en valor do granito e a lousa, fundamentalmente no exterior, así como na eficiencia enerxética, en aplicacións tecnolóxicas ou na integración do proceso produtivo.

• Potenciación, por parte das distintas administracións públicas, do uso da pedra galega, impedindo a competencia desleal coa utilización de materiais de países que non cumpren as normas ambientais nin de protección de saúde dos traballadores e traballadoras.

• Explotación racional do seixo, promovendo o peche de todo o seu ciclo produtivo en Galiza.

• Recuperación de todos aqueles espazos naturais degradados como consecuencia das explotacións mineiras.