Traballadores/as de ambulancias mobilízanse diante da Xunta en Ferrol para esixir o desbloqueo da negociación colectiva
Traballadores/as de ambulancias da área sanitaria de Ferrol concentráronse este luns para demandar o desbloqueo da negociación do convenio colectivo, iniciada xa hai case tres anos. A protesta, que se desenvolveu diante do edificio administrativo da Xunta, enmárcase no calendario de mobilizacións comarcais convocado pola FGAMT-CIG, preparatorias da manifestación nacional do vindeiro xoves 18 de outubro en Vigo.
Os traballadores e traballadoras levan meses mobilizándose en demanda dun convenio que permita recuperar dereitos e salarios; en rexeitamento ás pretensións dalgunhas empresas de aplicar modificacións substanciais das condicións laborais que suporían rebaixas salariais de case 400€ ao mes, máis carga de traballo e menos días libres; e para esixir que se cumpra co establecido nos contratos do SERGAS.
Neste senso, Beatriz Fernández, secretaria da FGAMT-CIG de Ferrol criticou a pasividade da Consellaría de Sanidade neste conflito, a pesar de ser a responsábel de levar o sector a unha situación de colapso por ter aceptado ofertas á baixa no concurso. Agora as empresas poñen como escusa que non lles chegan os cartos dos concursos para manter paralizada a negociación do convenio e mesmo pretender introducir recortes salariais e laborais.
Abuso dos contratos en prácticas nas empresas da comarca
Nesta liña, Fernández denunciou o deterioro das condicións laborais que se está a producir no transporte sanitario da área de Ferrol polo recorte dos cadros de persoal, as presións das empresas para que se fagan horas por enriba da xornada ou as eivan en prevención de riscos e medidas de seguridade.
Con todo, advirte, o máis grave é o abuso da contratación en prácticas. "Hai empresas que cobren os seus cadros de persoal con traballadores/as en prácticas, que non aínda teñen a formación adecuada, favorecendo así a precarización das condicións laborais do sector e o deterioro do servizo, pois non hai que esquecer que estamos falando dunha actividade especialmente sensíbel", subliña.
Fernández pon o acento en que xa hai empresas que contan só con tres ou catro persoas fixas e "o resto do cadro complétano con contratacións en prácticas, cando debería ser ao revés: o persoal de prácticas estase formando e polo tanto debería ser un apoio, non asumir o traballo principal".
Precisamente, limitar o uso deste tipo de contratos é un dos puntos da plataforma de convenio colectivo trasladada pola CIG, xa que esta modalidade permítelles as empresas ter un traballador ou traballadora durante dous anos cun salario rebaixado no 40% (no primeiro ano cobran o 60% do salario e o 75% no segundo) e sen obriga de facelos indefinidos unha vez remate o contrato. A central sindical pula por restrinxir este tipo de contratación que fomenta a temporalidade, crea dúas escalas salariais entre o persoal e supón un ataque á profesionalización do sector.
