Traballadoras de axuda no fogar concéntranse na CEG para esixir a negociación do convenio galego
Traballadoras dos servizos de axuda no fogar privatizados concentráronse este martes diante da sede da Confederación de Empresarios de Galiza para esixirlles que constitúan a mesa de negociación para a renovación do convenio colectivo do sector, sen actualizar dende 2012, a causa da disolución da asociación patronal de ámbito galego.
A CIG-Servizos lembra que a patronal galega disolveu a súa asociación despois da sinatura do último acordo na crenza de que desaparecendo eliminaba o convenio galego, pasando a regularse polo marco estatal. Un claro erro estratéxico xa que o convenio seguiu en vigor, mais en todo este tempo a parte social non logrou que o empresariado volvese organizarse para poder negociar un novo texto.
Con todo, dado que o convenio ten unha cláusula que expresa que se non se negocia un novo os aumentos salariais serán os que marque o IPC, as traballadoras/es puideron ir tendo unhas subidas mínimas.
Hai case dous anos que a CIG mantén reunións no Consello Galego para instar a patronal a que se asocie sen conseguir até agora avances neste sentido. Por iso, na concentración deste martes a central sindical entregou un escrito á CEG para que, en ausencia dunha asociación empresarial do sector, asuma a negociación do convenio e constitúa xa a mesa negociadora, posto que legalmente está capacitada para facelo.
Por un sistema público de coidados
A protesta, realizada tras da asemblea nacional de delegadas de axuda no fogar que tivo lugar no edificio CERSIA de Compostela para abordar a situación do convenio e debater as accións a desenvolver, marca o inicio dun calendario de mobilizacións coa que a CIG quere forzar a negociación do convenio galego e avanzar na dignificación das condicións laborais e salariais dun sector altamente feminizado e precarizado, pero que segue a estar pouco valorado social e economicamente a pesar de que se evidenciou esencial nesta pandemia.
Neste senso, cómpre lembrar que a CIG promoveu o pasado ano unha ILP no Parlamento galego na que solicita a creación dun Sistema Público Galego de Servizos de Atención ás Persoas integrado por unha única rede pública que preste os servizos que actualmente se ofrecen nos centros asistenciais e residenciais da terceira idade; centros de día; de atención á diversidade; servizos de axuda no fogar; e outros recursos como Casas Niño, casas das persoas maiores, xantar na casa etc.
Servizos que para a central sindical teñen que estar suficientemente dotados tanto de infraestruturas e material como de recursos humanos, “dignificando as condicións laborais e salariais de todo o persoal coa aplicación dun mesmo convenio colectivo”. Nomeadamente, incorporaranse a esta rede pública todos os actuais Servizos de Axuda no Fogar (SAF) e iniciarase a negociación cos axentes sociais dun convenio colectivo único que recolla unhas condicións laborais e salariais dignas.
