![Confederación Intersinidical Galega](/assets/cig/2022/logos/cig.png)
Máis do 70% do persoal secunda a quinta xornada de folga na CRTVG
![](assets/images/7/2023-05-12_folgaCRTVG.001-0d968467.jpg)
As redaccións amenceron baleiras, e máis unha vez caeu a programación non esencial, nesta quinta xornada de folga convocada na CRTVG. As traballadoras e traballadores denuncian os abusos laborais que sofren; rexeitan a manipulación informativa; reclaman a reasignación das compañeiras e compañeiros que, por este motivo, sufriron traslados forzosos e demandan unha radio e televisión públicas ao servizo do pobo.
![](imaxes/adaptadas/780/files/novas/2023/05/12/Quinta%20xornada%20de%20folga%20CRTVG/2023-05-12_folgaCRTVG.006.jpg)
O comité intercentros valora moi positivamente a alta participación, “similar á de xornadas pasadas”, que se sitúa por riba do 70 %. Un seguimento que provocou a caída de programas como A Revista, Atmosféricos, os deportes, Diario Cultural e que xa albiscan que fará caer tamén outros como Zigzag e o mítico Luar.
O Comité Intercentros fixo coincidir esta convocatoria de folga co arranque da campaña das eleccións municipais previstas para o vindeiro 28 de maio, co obxectivo de favorecer que en cada acto electoral que se celebre en cada concello galego se difunda e se informe á cidadanía do país da grave situación que atravesan os medios públicos de comunicación de Galicia, secuestrados, en opinión da representación legal do persoal, polo Partido Popular que goberna a Xunta, que utiliza a radio e a televisión de todas con fins exclusivamente partidistas.
Denuncian que a organización política que sustenta o goberno ten “secuestrados” os medios públicos e por iso teñen como obxectivo “colocar en cada mitin, en cada debate, en cada concello, a grave situación que atravesa a radiotelevisión públicar”.
![](imaxes/adaptadas/780/files/novas/2023/05/12/Quinta%20xornada%20de%20folga%20CRTVG/2023-05-12_folgaCRTVG.007.jpg)
Intento de achegamento
Co obxectivo de resolver o conflito, o Comité Intercentros aceptou a mediación proposta por un sindicato no seo do Consello Galego de Relacións Laborais. Un intento de achegamento, que a CRTVG tamén aceptou, pero que quedou en suspenso esta mesma semana, despois de dúas xuntanzas, ao non aceptar a empresa repoñer nos seus postos de orixe a varias traballadoras que foran trasladadas de medio (da radio á tele, da tele á radio ou da radio a internet), segundo o comité de empresa, como castigo por non ser dóciles ante a dirección.
A representación legal do persoal, alertada polo alto índice de baixas médicas motivadas polo clima laboral, reclama tamén con estas mobilizacións a elaboración dun estudo psicosocial actualizado, a negociación das condicións de traballo de categorías profesionais afectadas pola renovación tecnolóxica e a recuperación de dereitos que quedaron en suspenso coa lei de medidas temporais do emprego público de 2012, que incrementou a xornada de trinta e cinco a trinta e sete horas e media.
O comité de empresa avanza que intensificará as protestas durante toda a campaña electoral con accións selectivas e mantén firme a convocatoria de folga do propio día das votacións, o 28 de maio.