Delegadas e delegados de Correos mobilízanse no Centro de Lavacolla por un novo convenio
Delegados e delegadas de CIG Correos concentráronse esta mañá diante do Centro de Tratamento Automatizado de Correos en Lavacolla ( Santiago ) para demandar a negociación dun novo convenio colectivo para todo o cadro de persoal que garanta os mesmos dereitos que o resto de traballadores/as da Administración Xeral do Estado, tanto en permisos coma en retribucións.
A CIG-Correos denuncia as graves diferenzas salariais con respecto ao cadro de persoal da Administración do Estado. Indica, canda isto, que o persoal de novo ingreso en Correos apenas supera o salario mínimo interprofesional. Por iso rexeita proposta de Correos de flexibilidade retribuída. “Non imos cambiar nin vender dereitos”, aseguran.
Fronte a isto reclaman un incremento en retribucións fixas e “non variables que van ligadas a obxectivos moitas veces inalcanzables para non pagalos”.
A CIG-Correos establece, como obxectivos irrenunciables de cara á negociación dun novo convenio colectivo e Acordo Xeral entre outros puntos:
- Suba salarial con recuperación do IPC perdido ( máis dun 20% )
- Cláusula de revisión salarial para non seguir perdendo cartos.
- Incorporación do persoal laboral ao Convenio Único da Administración Xeral do Estado.
- Implantación xeral da xornada de 35 horas.
- Eliminación dos descontos abusivos en situación de IT.
- Concurso de traslados con cobertura de todos os postos vacantes.
- Conversión de todas as prazas de tempo parcial e fixos descontinuos en prazas de xornada completa
