Convocada folga nas residencias de maiores e nos centros de día privados ante a negativa da patronal a rematar coa precariedade
A CIG, CCOO e UGT anunciaron hoxe a convocatoria dunha xornada de folga para o vindeiro 18 de marzo nas residencias de maiores e nos centros de día privados de Galiza ante a negativa do empresariado a rematar coa elevada precariedade que padece o persoal do sector. Os sindicatos denuncian salarios de miseria, sobrecarga de traballo, cambios nos calendarios e falta de tempo para prestar unha atención de calidade, mais a patronal segue negándose a negociar un convenio colectivo que poña fin á “situación insostíbel” na que se atopan máis de 10.000 traballadoras/es no conxunto do país.
Unha representación de cada unha das tres centrais compareceu esta mañá en rolda de prensa en Vigo para explicar os detalles da decisión. Por parte da CIG, participaron a secretaria nacional e o secretario de Negociación Colectiva da federación de Servizos, Transi Fernández e Adolfo Naia, ademais da responsábel do sector de residencias privadas da CIG-Servizos de Ferrol, Beatriz Fernández.
Os responsábeis sindicais explicaron que a raíz da emerxencia sanitaria provocada pola pandemia do coronavirus a “grave situación” que padecían as traballadoras/as na maioría das residencias da terceira idade converteuse en “insostíbel”, con salarios de miseria, sobrecargas de traballo e falta de tempo para prestar unha atención de calidade ás persoas usuarias.
Ademais, este persoal, integrado na súa maior parte por mulleres, ten que soportar cambios continuos nos calendarios, falta de valoración psicosocial e modificacións constantes nos protocolos e nos criterios de seguridade. “E aínda por riba, por se todo isto fose pouco, a patronal négase a negociar un convenio digno”, lamentan.
Por iso consideran que é o momento de reactivar a negociación colectiva e desbloquear este conflito “para poñer enriba da mesa o esforzo e o sacrificio das empregadas/os durante toda a pandemia e esixirlle á Xunta e á patronal o recoñecemento económico e social que merecen”. En consecuencia, as tres centrais acordaron convocar unha xornada de folga o venres 18 de marzo “fronte á falta de vontade de negociar un convenio digno por parte da patronal e ante a inacción da Xunta”.
Unha cuestión social
O anterior acordo laboral caducou en 2019, polo que o persoal do sector continúa cos soldos conxelados dende entón, até o punto de que hai categorías laborais con salarios por debaixo do SMI. Mais o empresariado négase a mellorar as condicións económicas, a pesar de que o ano pasado pechou cun IPC do 6,5%, porcentaxe que as empresas xa aplicaron no prezo das prazas.
Ao mesmo tempo, inciden en que non se trata dun “simple conflito laboral” entre traballadoras/os e patronal, senón unha “cuestión social” que afecta a toda a sociedade galega, porque entenden que está en xogo a atención e o coidado das persoas maiores. “O dereito a un servizo de coidados de calidade e a prestación de coidados en condicións dignas están sendo vulnerados e non podemos mirar para outro lado”.
Critican que a Xunta de Galiza convertese os coidados nun negocio que permite que “as empresas privadas que xestionan servizos públicos financiados con diñeiro público estean a obter enormes beneficios económicos a costa da explotación salvaxe das traballadoras/es e da mala calidade do servizo”.
Diante disto, chaman ao conxunto da sociedade galega a apoiar as reivindicacións en defensa do persoal do sector, das persoas residentes e do interese social. “Animamos a todas as traballadoras/es do sector e a toda a cidadanía a participar activamente na folga e nas diferentes mobilizacións que se levarán a cabo”.
