![Confederación Intersinidical Galega](/assets/cig/2022/logos/cig.png)
Clamor na Coruña contra o peche da fábrica de Alcoa e polo mantemento dos empregos
![](assets/images/7/18-10-29_MarchaObreira_PecheAlcoa_007-59cc0ae7.jpg)
A Coruña volveuse encher na tarde deste luns do berro clamoroso contra o peche de Alcoa. A marcha obreira protagonizada polos traballadores e as traballadoras dende a fábrica até a Delegación do Goberno foi sumando continuos apoios durante o seu percorrido, así como o aplauso e o recoñecemento dos veciños e veciñas que unían as súas voces ás proclamas "Alcoa non se pecha" ou "Peche non, enerxía solución".
A medida que avanzaba cara ao centro da cidade, adheríanse á marcha ducias de persoas que querían amosar a súa solidariedade co persoal de Alcoa e a súa loita pola continuidade de 400 empregos, mais tamén demostrar así o rexeitamento á decisión da multinacional do aluminio que, de levarse adiante, afondaría no desmantelamento industrial da comarca da Coruña.
![](imaxes/adaptadas/780/files/novas/2018/10/29/Marcha%20Alcoa%20A%20Corunha/18-10-29_MarchaObreira_PecheAlcoa_003.jpg)
A mobilización contou co respaldo de numerosos representantes políticos e os/as compañeiros das fábricas de Ferroatlántica, que marcharon durante todo o traxecto coa súa propia faixa solidaria. Tamén participaron da mobilización o secretario xeral da CIG, Paulo Carril, e o secretario nacional da CIG-Industria, Xoán Xosé Bouzas Aboi, así como delegados da central na planta de Alcoa-San Cibrao.
Un dos apoios máis sentidos foi o dos bombeiros/as da Coruña, quen ao paso da manifestación por diante do parque municipal acenderon as sereas dos camións e penduraron unha faixa no alto dun guindastre, coa que posteriormente un grupo de bombeiros se uniu á marcha.
"Alcoa déixanos sen futuro"
Varios quilómetros despois, a mobilización chegaba a Praza da Palloza, onde centos de persoas recibían entre calorosos aplausos os traballadores e traballadoras. Alí, os seus fillos e fillas tomaron o relevo da cabeza da manifestación cunha pancarta na que se podía ler "Alcoa déixanos sen futuro". Un emotivo momento, que foi amplamente retratado polos numerosos medios gráficos presentes.
![](imaxes/adaptadas/780/files/novas/2018/10/29/Marcha%20Alcoa%20A%20Corunha/18-10-29_MarchaObreira_PecheAlcoa_028.jpg)
No medio dunha persistente choiva, a marcha continuou o recorrido previsto até rematar, por volta das oito da tarde, diante da Delegación do Goberno, onde membros do comité mantiveron unha reunión co representante do Estado en Galiza.
A representación social demanda mesas separadas
O conflito entra nunha semana clave xa que, de non producírense cambios radicais, mañá mércores día 31 iniciarase o período de consultas do ERE. Neste senso, Julio Moskowich, delegado da CIG no comité de Alcoa, explica que a representación social da Coruña non ten intención de acudir a Madrid á constitución da mesa única, ao entender que o expediente debe ser negociado en cada unha das fábricas afectadas "pois somos dúas empresas diferentes e cada centro de traballo ten o seu comité".
Sobre os argumentos defendidos pola multinacional para xustificar o ERE, Moskowich reiterou que o despedimento colectivo non ten razón de ser, "cando o Grupo Alcoa no Estado español ten abundantes beneficios". De feito, puxo en cuestión as razóns esgrimidas pola empresa, que agora di que un dos problemas é o prezo da materia prima, "pero iso é algo conxuntural. O realmente determinante para nós é o prezo da enerxía eléctrica", aseverou.
![](imaxes/adaptadas/780/files/novas/2018/10/29/Marcha%20Alcoa%20A%20Corunha/18-10-29_MarchaObreira_PecheAlcoa_018.jpg)
Por iso, dende o comité esíxenlle á multinacional a retirada inmediata ERE e a partir de aí iniciar unha negociación con todas as partes implicadas para abordar un cambio en todo o sistema eléctrico e demandar un marco enerxético estábel. "Cun prezo da electricidade competitivo estas fábricas son viábeis, porque tecnoloxicamente funcionan, non están obsoletas, como di a empresa. O único problema que temos é o prezo da enerxía, que comparada cos prezos doutros países de Europa é elevadísima e iso é o que nos resta competitividade", advirte.
En canto ao papel dos diferentes gobernos, dende a representación social reclámanlle "que se poñan á fronte da defensa dos postos de traballo e da industria. O que non se pode permitir é que veñan as multinacionais aquí a facerse con empresas que foron públicas, practicamente regaladas, espreman todo o que poidan e cando queren desmantélanas e marchan para outro lado", denunciou Moskowich.
Neste senso, o delegado da CIG insistiu en que se Alcoa non quere as fábricas "que as poña as venta ou que se faga o Estado cargo delas nacionalizándoas. Pero as administración non poden consentir que pare a produción industrial nestas factorías porque o aluminio é un sector estratéxico para a economía do noso país".
Así as cousas, o persoal mantén o piquete permanente diante da fábrica para impedir a saída do produto elaborado. Ademais, segundo o calendario de negociacións que a empresa vaia pondo enriba da mesa, "iremos dando a resposta adecuada".
Marcha a pé do persoal de Alcoa San Cibrao
![](imaxes/adaptadas/780/files/novas/2018/10/29/Marcha%20Alcoa%20San%20Cibrao/18-10-29_Marcha_AlcoaSanCibrao_05.jpg)
Coincidindo coa mobilización na Coruña, os traballadores e as traballadoras da fábrica de Alcoa en San Cibrao realizaron na mañá de onte unha marcha a pé dende as instalacións até a Casa do Concello de Burela. Con esta mobilización buscan trasladar o apoio á loita dos compañeiros e compañeiras de Alcoa na Coruña e Avilés, mais tamén reclamar un cambio no marco regulador da enerxía.
Con tal fin, o comité fixo entrega a representantes dos grupos políticos dun escrito coas propostas do comité para acadar unha tarifa eléctrica "que permita manter os postos de traballo na industria electrointensiva". Neste senso, o presidente do comité, Xosé Paleo (CIG) advertía ao remate da marcha que "se queremos que a industria non marche deste país temos que acadar un prezo da enerxía xusto e estábel".
"Parece mentira que nun país como Galiza, produtores e exportadores de enerxía eléctrica, vexamos ameazados os empregos porque non temos un prezo da electricidade que nos permita competir con outros países de Europa", valorou Paleo.
Tarifa industrial estábel
![](imaxes/adaptadas/780/files/novas/2018/10/29/Marcha%20Alcoa%20San%20Cibrao/18-10-29_Marcha_AlcoaSanCibrao_04.jpg)
Cómpre lembrar que a CIG vén de trasladarlle aos gobernos español e galego e á patronal unha proposta para a creación dunha tarifa industrial estábel, con variacións predicíbeis á que se poidan acoller estas empresas con grandes consumos de enerxía.
Pero a cambio de poder acollerse a esta tarifa rebaixada, as empresas terán a obriga de realizar inversións e melloras nos procesos produtivos para manter e ampliar o nivel de emprego directo, evitando así medidas como a anunciada por Alcoa, que deixa no aire o futuro de 400 empregos nun sector estratéxico para o país, como o do aluminio. Así mesmo, as empresas acollidas a esta tarifa terían que pular polas condicións laborais e sociais nos convenios colectivos, que deberán ser actualizados, como mínimo, co IPC anual.