![Confederación Intersinidical Galega](/assets/cig/2022/logos/cig.png)
Atinxido un preacordo para o convenio colectivo en Leche Celta tras 18 xornadas de folga
![](assets/images/a/22-02-08_AsembleaPreacordoLecheCelta_01-8db0762a.jpg)
A representación do persoal e a dirección de Leche Celta SLU de Pontedeume chegaban a un principio de acordo a primeira hora da tarde deste martes, tras unha reunión de mediación que se prolongou durante máis de seis horas. Este achegamento prodúcese cando se cumpre a 18ª xornada de folga parcial que están sostendo os traballadores e as traballadoras da fábrica, que deberán ratificar este preacordo nas asembleas que se celebran esta tarde-noite.
![](imaxes/adaptadas/780/files/novas/2022/02/08/22-02-08_AsembleaPreacordoLecheCelta_02.jpg)
O pacto acadado contempla un incremento salarial do IPC real no conxunto do convenio colectivo durante os anos de vixencia (2021-2024), cun tope do 4.5% máis as subas porcentuais correspondentes a cada exercicio. Deste xeito, explica Fran Cartelle, representante da CIG, conséguese a principal reivindicación do persoal a nivel económico: que se garanta o poder adquisitivo dos salarios.
Xunto a isto, lógranse melloras na retribución da nocturnidade, incrementar o prezo de todos os festivos traballados, reducir a xornada anual en oito horas e subir o abono dos festivos especiais (24, 25 e 31 de decembro e 1 de xaneiro) até os 120€, que terán cada ano o incremento correspondente ao convenio.
Así mesmo, equipáranse os permisos das parellas de feito cos de matrimonio e establécese por convenio que as licencias comecen a contar en día laborábel. Tamén se amplía a xornada de verán para o persoal administrativo e créase unha comisión para a reclasificación das categorías, o que suporá á súa vez un incremento nos salarios.
En canto ás pretensións empresariais de introducir un sistema retributivo ligado á produtividade e ao absentismo, esta sae do convenio e as partes quedaron emprazadas a crear unha comisión na que estudar a creación doutros complementos retributivos e a fixación dos seus parámetros.
Sen loita non hai mellora das condicións
Cartelle pon en valor que este acordo non sería posíbel sen a determinación e a forza das traballadoras e dos traballadoras para levar adiante unha folga que hoxe cumpre 18 días (9 xornadas de paro parcial alternos en xaneiro e 9 xornadas de folga parcial indefinida), e que rexistraron un seguimento do 100% malia as prácticas de esquirolaxe e os intentos de intimidación da empresa.
Engade que este conflito é exemplo de que a loita, a unidade e a mobilización son o único camiño para que se produzan avances substanciais nas condicións de traballo, e destaca a importancia fundamental de achegar a negociación colectiva aos centros de traballo para así implicar e organizar o persoal na negociación e ter a capacidade de presión suficiente para lograr convenios dignos.