A CIG gaña no TSXG a demanda contra os abusos nos servizos mínimos da folga na sanidade privada da Coruña
A CIG vén de conseguir unha importante vitoria xudicial no Tribunal Superior de Xustiza de Galiza (TSXG), que estima a súa demanda contra o decreto de servizos mínimos imposto pola Consellaría de Sanidade durante as xornadas de folga na negociación do convenio colectivo da sanidade privada da Coruña.
A sentenza recoñece que a Administración delega nas empresas privadas a regulación dos servizos mínimos, permitindo que sexan estas quen determinen os servizos mínimos que deberían garantir o equilibrio entre a continuidade asistencial e o dereito fundamental á folga. Este proceder supón un empoderamento das empresas fronte ao dereito á folga das traballadoras, restrinxindo de maneira desproporcionada o exercicio deste dereito fundamental.
Sanidade permitu que as empresas determinaran os mínimos
Segundo o responsábel de negociación colectiva da CIG-Saúde, Miguel Tizón, esta resolución "confirma o que levamos tempo denunciando: que os servizos mínimos eran abusivos e a Consellaría de Sanidade permitiu que foran as propias empresas quen os regularan, convertendo este mecanismo nun instrumento de represión contra as traballadoras en folga.”
A folga é un dereito fundamental e esta sentenza demostra que as empresas e a Administración estaban actuando ilegalmente para desactivar as protestas"
O TSXG di que “(…) nin se motivaron os criterios para fixar os servizos mínimos, nin foron en modo algún proporcionados, senón que foron de forma xenérica, gratuíta e inmotivada, de forma que se apoderou (o delegou) ás titulares dos centros a concretar eses servizos mínimos con total liberdade e de maneira que no facía fiscalizábel o seu control, como tampouco se garantía o dereito ao exercicio efectivo da folga para quen o desexara…”.
A CIG considera que esta resolución dá a razón á súa loita, poñendo en valor o traballo realizado polas delegadas e delegados sindicais, que tiveron que enfrontarse ás imposicións abusivas das empresas e defender os dereitos das traballadoras ante unha grave vulneración do seu dereito á folga.
“A folga é un dereito fundamental e esta sentenza demostra que as empresas e a Administración estaban actuando ilegalmente para desactivar as protestas das traballadoras da sanidade privada. Isto é unha vitoria da loita sindical e da dignidade das traballadoras”, subliña Miguel Tizón.
Dende a CIG, valoramos esta sentenza como un paso adiante na defensa dos dereitos laborais na sanidade privada e reafirmamos o noso compromiso en seguir denunciando calquera intento de limitar ou vulnerar os dereitos das traballadoras.
