![Confederación Intersinidical Galega](/assets/cig/2022/logos/cig.png)
A CIG esixe un novo convenio da carpintería que acabe con 3 anos de parálise no sector
![](assets/images/5/2016-12-23-ACorunha-ConvenioCarpinteria-03-7ab40375.jpg)
A Federación de Construción e Madeira da CIG denunciou esta mañá ante a Confederación de Empresarios da Coruña que, 3 anos despois da súa caducidade, o Convenio de Carpintería e Ebanistería segue sen asinarse, situación de parálise da que a CIG culpa directamente ao desmantelamento da patronal AECEC. En consecuencia produciuse un aumento da precariedade no sector e unha perda económica que a central estima nuns 520€ por traballador/a.
![](imaxes/adaptadas/780/files/novas/2016/12/23/EmpregoConstrucionCNAE.jpg)
O Convenio de Carpintería e Ebanistería da provincia da Coruña afecta a 1.600 traballadores e a uns 200 centros de traballo, "ao que se sumamos toda a actividade relacionada que xera (rematantes e serradoiros, instaladores...), a madeira ocupa na provincia a algo máis de 500 empresas que contan cuns 2.800 empregados/as", apuntan dende a FCM-CIG.
Estas cifras reflicten o dramático descenso de actividade no sector, pois no 2010 ocupaba 1.000 empresas con máis de 4.500 traballadores/as. Isto significa que en só 5 anos desapareceron case 500 empresas, é dicir, o 49% do sector, e destruíronse case o 39% dos postos de traballo directos.
![](imaxes/adaptadas/780/files/novas/2016/12/23/2016-12-23-ACorunha-ConvenioCarpinteria-01.jpg)
"Non é admisíbel que neste escenario crítico, a patronal opte directamente polo abandono do convenio, pois isto agrava a situación ao provocar a desregulación da actividade e por tanto máis inestabilidade nun sector que non hai tanto tempo era (e deberá volver ser) estratéxico no noso País", subliña Mario Maceiras, da FCM da Coruña.
Diante deste bloqueo, a Federación leva semanas desenvolvendo unha intensa campaña para esixir á patronal coruñesa "que tome cartas no asunto" e convoque ás partes a negociar un novo texto que actualice os salarios e remate coa inestabilidade que se vive no sector.
Campaña informativa nos centros de traballo
![](imaxes/adaptadas/780/files/novas/2016/12/23/2016-12-23-ACorunha-ConvenioCarpinteria-04.jpg)
Esta campaña iniciouse co envío de cartas as patronais e empresas para denunciar esta situación, seguido dun reparto masivo de información entre os traballadores e as traballadoras de todas as carpinterías da provincia.
E finalmente, a mobilización deste venres, que reuniu a unha trintena de delegados/as sindicais das maiores empresas do sector, "e que non será a última se a situación non se corrixe á entrada do 2017".