Xubilados/as e pensionistas da CIG acusan a Feixó de descoñecer a realidade da dependencia en Galiza
Diante das afirmacións realizadas na súa intervención no debate do estado da nación, o colectivo de xubiladas/s e pensionistas da CIG acusa ao presidente da Xunta de descoñecer a realidade da dependencia en Galiza; de esquecer as máis de 8.000 solicitudes aprobadas de persoas dependentes que aínda non están a percibir unha prestación e de vender fume coa construción futura dunhas residencias que seguirán sendo insuficientes para atender a crecente demanda existente.
O colectivo denuncia que fronte o abandono que viven as persoas que na Galiza sofren unha situación de dependencia, por parte da administración, Núñez Feixó “só pode vender como logro no debate do estado da nación 7 residencias da terceira idade que non só non están feitas, senón que ademais non se van facer con cartos públicos, senón que son “doazón” dun empresario”.
Sinalan que o propio Presidente da Xunta recoñece que nos vindeiros anos chegaremos a unha cifra de preto dun 33% de persoas maiores de 65 anos na Galiza. Por iso, advirten de que nun escenario de avellentamento tal, e coa sangría da emigración de xente nova que ven padecendo o noso país, “a atención á dependencia vai ser cada vez máis unha necesidade básica para miles de persoas. Xa hoxe o é”.
De aí que denuncien que Feixó, no seu discurso no Parlamento, “parece vivir nun conto de fadas que en nada se parece á realidade”. Nese sentido, lembran que xa en decembro de 2017 o Colectivo de Xubilados/as e Pensionistas da CIG denunciaba que miles de persoas que tiñan recoñecido algún grao de dependencia, mais non estaban sendo beneficiarias da prestación á que tiñan dereito por lei. “Cos datos de agosto de 2019, non mellorou moito a cousa, malia o grandilocuente discurso de Núñez Feixó, posto que son máis de 8.000 as solicitudes aprobadas e que inda non están a percibir a prestación adxudicada”.
Diante desta situación pregúntanse se “é esta a atención á dependencia que necesitan as galegas e galegos? Datos manipulados e infraestruturas que están por facer cos cartos dunha doazón?”
Un Presidente que vende “fume”
O colectivo reitera que unha administración pública debe garantir que as necesidades básicas da poboación estean cubertas e debe facelo cos recursos públicos e sinala que “se despois de dez anos gobernando a Xunta de Galiza, o que pode explicar Feixó como logro no que respecta á dependencia é a futura construción de sete residencias da terceira idade, que fixo durante todo este tempo para atender ás miles de persoas que viven situacións de dependencia? Nada, e por iso foron milleiros as persoas que faleceron sen ter recibido ningún tipo de prestación nin a máis mínima atención ás súas necesidades”.
Para as e os xubilados e pensionistas da CIG o Presidente da Xunta “anuncia medidas que non son máis que fume, como residencias que están por vir, ou un decreto de concerto social que non é outra cousa que a privatización da atención á dependencia”.
Contra isto, o colectivo de Xubilados/as e Pensionistas da CIG vén desenvolvendo no último ano unha campaña de recollida de sinaturas –que serán en breve presentadas ao goberno galego e que veñen avalar as súas demandas- para exixir unha adecuada atención á dependencia a través do incremento nos orzamentos para o 2020 das partidas dos programas de atención á dependencia.
Xunto a isto demandan que se poñan en marcha as accións necesarias para garantir unha atención adecuada a través dunha rede pública de recursos cun acceso equitativo, de xeito que todas as galegas e galegos vexan cumprido o seu dereito a unha vida digna cando as súas circunstancias lles impiden poder facelo autonomamente.
O colectivo entende ademais que así non terán que ser as mulleres, unha vez máis, as que asuman en exclusividade esas tarefas de coidado.
