Día de mobilizacións no sector do siderometal galego para reclamar convenios provinciais dignos
O sector da siderometalurxia galega continúa en pé de guerra para reclamar uns convenios provinciais dignos. Á nova xornada de folga celebrada no provincia da Coruña, que volveu ter un seguimento masivo tal e como evidenciaron as multitudinarias manifestacións, sumáronse hoxe mobilizacións en Vigo, Pontevedra, Ourense e Vilagarcía.
Na comarca da Coruña, a nova xornada de paro afectou unha vez máis á grande empresa de maquinaria pesada, talleres e reparación. As poucas compañías que tiveron actividade pecharon as súas portas ao paso da manifestación, que volveu percorrer a distancia entre a Confederación de Empresarios/as e a Delegación do Goberno. “A folga estase a consolidar”, resume Eduardo Caamaño, secretario comarcal da CIG-Industria. Ademais, as centrais aproveitaron para rexistrar a convocatoria de tres novos días de folga para o 13, 20 e 27 de xullo.
No caso de Ferrol, tanto a participación dos piquetes como a da manifestación foi moi elevada, xa que máis de 3000 persoas percorreron a pé o camiño entre a Praza de España e o polígono da Gándara, para regresar novamente ao punto de partida. “Houbo moito máis persoal das compañías auxiliares de Navantia que en días anteriores”, comenta o secretario comarcal da CIG-Industria, Vicente Vidal. Na marcha tamén tomou parte unha nutrida representación de traballadores/as do sector de viaxeiros/as por estrada, que hoxe secundaron tamén masivamente unha nova xornada de folga.
Amplo seguimento en Compostela
En Compostela o seguimento foi xeneralizado e a actividade dos piquetes limitouse a pasear polo polígono do Tambre, para confirmar que todas as empresas estaban pechadas. O secretario comarcal da CIG-Industria, Benedicto Blanco, valora moi positivamente a incidencia do paro, porque o número de traballadores/as do sector que se suman aos piquetes e mobilizacións vai en aumento.
Ademais, salienta que ás empresas nas que a folga foi total nos paros anteriores hai que engadir agora a Macoga, de Ordes que pechou todo o día e mesmo a Cortizo, que tivo que pechar liñas de produción por falta de persoal. Un exemplo, asegura Blanco, “de que nin coas ameazas os empresarios están conseguindo rebentar a folga”. Con todo, denuncia que houbo unha mínima actividade nalgunha empresa, precisamente por esas presións e ameazas, como foi o caso de Automóviles Louzao, concesionaria da Mercedes, que “nin sequera foi quen de traballar con normalidade porque a pesar diso faltaba a maioría do persoal”.
Contra o mediodía os traballadores/as do sector sumáronse ao piquete para saír en manifestación desde o polígono do Tambre até a Confederación de Empresarios/as, onde remataron cunha concentración.
Protestas en Vigo, Pontevedra, Ourense e Arousa
Coincidindo coa xornada de folga na provincia da Coruña, desenvolvéronse mobilizacións en Vigo, Pontevedra, Ourense e Vilagarcía para reclamar uns convenios dignos. No caso de Vigo arredor de 200 delegados/as do sector concentráronse diante de ATRA e Instalectra, patronais dos talleres de reparación de automóbiles.
A protesta de Pontevedra, á que tamén se sumaron un bo número de empregados/as do sector do transporte, tivo lugar na Cámara de Comercio e impediu o tránsito rodado pola rúa Reina Victoria. No caso de Ourense o lugar escollido para a conentración foi o concesionario da marca Renault situado en Quintela de Canedo, cuxo propietario participa nas negociacións. En Vilagarcía desenvolveuse unha mobilización na Federación de Empresarios/as da Comarca de Arousa (Feca).
