O 80% do persoal de Universal Support que atende a ‘Superliña’ do Santander secunda a folga para reclamar condicións dignas
O 80% do persoal que atende a ‘Superlínea’ do Banco Santander está secundando este xoves a primeira das dúas xornadas de folga parcial para exixir salarios dignos acordes ás tarefas complexas que realizan, que se rebaixe a carga de traballo e a presión comercial, e que se corrixa a mala organización por parte da empresa que presta o servizo, Unversal Support.
Para darlle máis visibilidade á súa loita, durante o paro da mañá (que se desenvolveu de 9 a 12 horas) o persoal realizou unha concentración diante da oficina que o Santander ten no Cantón Pequeno da Coruña, xa que os problemas no servizo afectan de cheo á atención telefónica que se lle dá á clientela do banco. O paro continúa na quenda de tarde das 16 ás 19 horas e repetirase o próximo venres 13 de marzo.
Na campaña Superliña -que presta Universal Support dende Bergondo- traballan unhas 180 persoas que realizan tarefas similares ás dunha oficina bancaria, pero o convenio que se lles aplica é o de centros de chamadas, de condicións moi inferiores e que, a nivel salarial, apenas supera o SMI na categoría de persoal teleoperador. “E aínda por enriba, moita persoas están con xornada parcial o que reduce aínda máis os seus ingresos”, denuncia Carlos Parrondo, delegado da CIG.
Por iso, unha das principais reivindicacións do comité coa convocatoria destes paros é que se recoñeza a todo o persoal deste servizo a categoría de xestor, nivel 9, do convenio colectivo como o inicio do camiño para dignificar as condicións económicas e retribuír adecuadamente a complexidade do traballo feito.
Pero ademais, á precariedade salarial súmase que esta campaña ten un gran carga de traballo e unha enorme presión para a consecución de obxectivos comerciais, polo que outra das demandas “é que se rebaixen a presión e os obxectivos excesivos cos que vivimos día a día e se corrixa a mala organización da empresa, que empeora sen que se resolvan incidencias de horarios, vacacións ou abonos pendentes”.
Sobre a incidencia da folga, Parrondo salientou que ten un importante impacto entre a clientela, “pois no propio día a día xa se traballa con esperas de bastante tempo”. Por iso, aseverou, “agardamos que a empresa e o Banco Santander tomen nota e reconsideren que teñen que mellorar as nosas condicións de traballo”.
