![Confederación Intersinidical Galega](/assets/cig/2022/logos/cig.png)
Unhas 300 persoas percorren as rúas de Ponteareas en defensa do emprego en Ganomagoga
![](assets/images/a/23-03-16_Manifa_Ganomagoga_Ponteareas_01-3a69e48a.jpeg)
Arredor de 300 persoas participaron na manifestación convocada este xoves polo comité de empresa de Ganomagoga para reclamar unha solución á crítica situación económica que atravesa o grupo de empresas que permita o mantemento dos preto de 200 postos de traballo. A representación sindical manterá unha xuntanza coa Subdelegación do Goberno en Pontevedra tras o encontro celebrado onte coa Consellaría de Industria, no que os responsábeis do departamento autonómico trasladaron a existencia de posíbeis inversores que estarían interesados en adquirir algunhas das compañías do grupo, mais sen achegar nada en concreto.
![](imaxes/adaptadas/780/files/novas/2023/03/16/Manifa%20Ganomagoga/23-03-16_Manifa_Ganomagoga_Ponteareas_02.jpeg)
A marcha a pé arrincou pasadas as 18:30 horas e tardou hora e media en percorrer a distancia entre as instalacións de Talleres Ganomagoga, na Gándara, na parroquia de Areas, e o Concello de Ponteareas, onde a mobilización quedou disolta tras a intervención do presidente do comité de empresa, Xabier Pérez, da CIG, quen agradeceu a todos os presentes o seu apoio e solidariedade e reafirmou o compromiso dos traballadores/as de Ganomagoga coa loita polo mantemento dos empregos. “Somos moitas familias afectadas por esta situación e imos continuar loitando en defensa dos nosos postos de traballo”.
Dende o comité de empresa explicaron que no marco das xestións institucionais postas en marcha para intentar salvar os postos de traballo o vindeiro martes 21 manterán unha xuntanza cos responsábeis da Subdelegación do Goberno español en Pontevedra. Onte tivo lugar un encontro coa Consellaría de Industria, no que dende o departamento autonómico se lles trasladou a existencia de posíbeis inversores interesados en adquirir algunhas das compañías que integran o grupo, mais sen achegar ningunha oferta nin proposta concreta.
Os responsábeis de Industria limitáronse a sinalar que analizarán toda a documentación do ERE para a totalidade do persoal presentado pola empresa, “e que no caso de que estea todo en regra non poden facer nada para paralizar o proceso de rescisión de contratos”. Neste senso, dende o comité anuncian que continuarán coa campaña de mobilizacións e de xestións institucionais en defensa do emprego en Ganomagoga.