O Comité de Ainair (auxiliar de Navantia) desconvocou a xornada de protesta prevista para este xoves logo de que a empresa se comprometera a abonar os salarios e as indemnizacións pendentes a 16 traballadores/as despedidos/as, algúns co contrato rescindido xa o pasado 5 de decembro, así como a pagar de xeito puntual as nóminas ao resto dos seus empregados/as.

Así o comunicaron dende o Comité, que tiña convocada para hoxe unha xornada de folga e unha concentración diante do estaleiro de Navantia Ferrol, que finalmente ficou suspendida. Dende a representación do persoal aproveitaron para agradecer ao Comité de Navantia, ás federacións do sindicatos con representación e aos traballadores/as do estaleiro o apoio amosado.

Ainair tiña pendente de pagar a nómina do mes de novembro e as indemnizacións correspondentes a 16 operarios/as despedidos; ademais de seren habituais os atrasos no abono das mensualidades ao resto do persoal. Logo de acordar as medidas de presión, a empresa accedeu a sentar a negociar e comprometeuse a pagar as cantidades pendentes, que xa ingresou, polo que as mobilizacións ficaron suspendidas.

Novas relacionadas