![Confederación Intersinidical Galega](/assets/cig/2022/logos/cig.png)
Persoal do servizo de acompañamento escolar reclama á Xunta que obrigue a Monbus a cumprir o convenio colectivo
![](assets/images/0/22-03-02_ConcentracionTransporteEscolar_03-0bcf03e0.jpg)
Traballadoras e traballadores do servizo de acompañantes do transporte escolar concentráronse diante do edificio da Xunta na Coruña para denunciar a precarización das súas condicións laborais e os reiterados incumprimentos dende que o Grupo Monbus se fixo coa maioría do servizo. O persoal reclama da administración galega que abandone a súa actitude de permisividade absoluta coa empresa e lle esixa respectar o establecido no convenio colectivo de aplicación, o do transporte de viaxeiras/os por estrada, e nos pregos de condicións dos contratos.
![](imaxes/adaptadas/780/files/novas/2022/03/02/transporte%20escolar/22-03-02_ConcentracionTransporteEscolar_02.jpg)
Este sector, ocupado de xeito maioritario por mulleres, ten unhas condicións cativas pero dende a chegada de Monbus, que presta actualmente a metade do servizo de transporte escolar en Galiza, estas foron a peor. "Non se están respectando as xornadas mínimas de dúas horas que marcan os pregos -hai traballadoras con xornadas dunha hora- e ao persoal subrogado que tiña contrato fixo-discontinuo estanlle facendo contratos eventuais pola duración do curso", explica o responsábel de Transportes da CIG, Xesús Pastoriza.
Advirte que malia que a este colectivo se lle ten que aplicar o convenio galego do transporte de viaxeiros/as, Monbus aplícalles o Estatuto dos Traballadores e Traballadoras, sen respectarlles nin as xornadas laborais, nin a antigüidade, nin as condicións que tiñan nas anteriores concesionarias. De feito, hai persoal que non foi subrogado directamente pola nova empresa (como se establece no convenio) senón que pasou a estar contratado a través de ETT.
Por se non fora abondo, tamén se rexistran problemas co pago dos salarios, e en moitos casos non se están abonando as nóminas até o día 10. "Traballas unha hora e páganche media e aínda por enriba páganche tarde. Monbus non quere arranxar as antigüidades, non quere regularizar as xornadas e tenos contratadas por ETT aínda que non pode, porque así o determina o convenio", denuncia unha das traballadoras da zona de Ferrolterra que leva 14 anos neste servizo. Estas irregularidades, matiza, xa foron denunciadas tanto diante da Xunta de Galiza como na vía xudicial.
![](imaxes/adaptadas/780/files/novas/2022/03/02/transporte%20escolar/22-03-02_ConcentracionTransporteEscolar_05.jpg)
Pero este recorte de dereitos non afecta só as súas retribucións, xa que ao reducir a xornada "non só perdemos salarios senón que tamén nos recortan as bases de cotización, o que nos afecta á hora de cobrar o desemprego no verán ou cando accedamos á xubilación", salienta.
Neste conxunto de despropósitos, apunta Xesús Pastoriza, a empresa nin sequera achega as instrucións precisas ás traballadoras para solución as incidencias. "Cando ocorre algún incidente, as traballadoras teñen que saber a quen dirixirse, pero agora mesmo, cando chaman a empresa porque hai problemas no servizo ninguén colle o teléfono, nin obteñen resposta".
Actuacións temerarias do grupo Monbus
A máis da problemática laboral, Pastoriza pon a atención no feito de que Monbus non conta co número de autobuses nin cos condutores e condutoras suficientes para atender o servizo, polo que está destinando un único coche para facer dúas rutas. "A consecuencia é que o persoal condutor vese obrigado a ir toda présa para cumprir cos horarios, co risco que isto implica para a seguridade viaria".
Denuncia esta forma de traballar temeraria do grupo Monbus, que incluso ten persoas apuntando os horarios dos e das condutoras, "e cada vez que chegan con atraso a unha parada métenlles presión para que apuren e cheguen ao seguinte servizo. Este proceder é intolerábel, ten que haber uns tempos lóxicos para funcionar á velocidade adecuada".
Permisividade total da Xunta
![](imaxes/adaptadas/780/files/novas/2022/03/02/transporte%20escolar/22-03-02_ConcentracionTransporteEscolar_06.jpg)
Pastoriza acusa a Xunta de permitirlle á empresa realizar todas as falcatruadas que quere, xa que a pesar das ducias de denuncias presentadas tanto polo sindicato, como polas ANPA e os centros educativos, nin a dirección xeral de Mobilidade nin a Consellaría de Educación teñen adoptado ningunha medida para obrigar a Monbus a cumprir cos pregos dos contratos e coas condicións laborais. "A política de mobilidade deste país pasou a estar nas mans de Monbus", alerta.
As eivas non afectan só ao servizo escolar, senón que atinxen ao conxunto do transporte de viaxeiros e viaxeiras por estrada, sector no que o Grupo Monbus ten practicamente o monopolio. Por iso, a CIG adianta que continuará mobilizándose para esixir o cumprimento dos pregos de condicións e do convenio colectivo e para que se dea un servizo público de calidade.
E nesta liña, indicou Pastoriza, a central nacionalista tamén apoiará as protestas convocadas polos colectivos de usuarios/as, ANPA, centros educativos etc. "porque en todos os anos que levo no sector nunca tan mal funcionou nin nunca tantas queixas houbo".