![Confederación Intersinidical Galega](/assets/cig/2022/logos/cig.png)
Traballadoras do SAF de Teo, Narón e Vigo mobilízanse en demanda da suba do 6,5% dos salarios
Traballadoras do Servizo de Axuda no Fogar do Concello de Teo, do Concello de Vigo e do Concello de Narón concentráronse na tarde do mércores e na mañá deste xoves, respectivamente, para demandar das empresas concesionarias do SAF que cumpran o convenio colectivo e procedan á aplicación inmediata da suba salarial do 6,5%, que corresponde ao IPC real de 2021.
![](imaxes/adaptadas/780/files/novas/2022/06/30/SAF/22-06-30_ConcentracionSAF_Teo_02.jpg)
As tres protestas realizáronse coincidindo coa celebración dos plenos municipais nos que se votou unha moción da CIG instando as administracións responsábeis (Concellos e Xunta) a que demanden das empresas concesionarias (Fepas no caso de Teo e Narón e Servisar no de Vigo) o cumprimento do convenio colectivo e se garantan os dereitos laborais das traballadoras.
O pleno de Teo aprobou por unanimidade a moción, mentres que no de Narón a moción saíu adiante mais co voto en contra do grupo municipal do PP. Na sesión plenaria de Vigo, o documento foi aprobado, ainda que o PSOE votou en contra dun dos puntos da moción.
Ademais, mañá deste xoves, as traballadoras do SAF de Compostela (adxudicado tamén a Servisar) mobilizáronse polo mesmo motivo, mais nesta ocasión, coincidindo nunha manifestación conxunta co persoal doutras contratas municipais.
Campaña pola dignificación
![](imaxes/adaptadas/780/files/novas/2022/06/30/SAF/22-06-30_ConcentracionSAFNaron.jpg)
Estas concentracións enmárcase na campaña que a CIG-Servizos ten en marcha pola dignificación das condicións laborais e salariais deste sector, que cumpre un papel esencial dentro da sociedade, pero que segue a ser un dos traballos máis precarizados e feminizados que existe.
Por iso, a CIG-Servizos está a promover, naqueles concellos que teñen externalizado a prestación do SAF e nos que a central sindical conta con representación, mocións e preguntas nos plenos para que se recoñeza o gran traballo e a función esencial que desempeñan as traballadoras de Axuda no Fogar e demandar unha mellora substancial das súas condicións laborais.
Incremento do prezo do servizo
No texto das mocións ínstase a Xunta de Galiza (como responsábel destes servizos públicos) a que incremente o prezo do servizo e que este incremento reverta en melloras para as familias e nas condicións laborais das traballadoras. De igual xeito, dos gobernos municipais demándase que supervisen os contratos do SAF e que reclamen das empresas concesionarias o cumprimento da legalidade laboral vixente, garantindo os dereitos do persoal.
![](imaxes/adaptadas/780/files/novas/2022/06/30/SAF/22-06-30_ConcentracionSAF_Vigo_01.jpg)
As profesionais destes servizos levan anos denunciando os abusos das empresas concesionarias, que non cumpren sequera cos pregos de condicións, nomeadamente nas cuestións relativas á xornada, descansos ou ao pago pola quilometraxe, pois non hai que perder de vista que traballan en domicilios particulares aos que se desprazan nos seus propios vehículos.
A isto súmase que o convenio colectivo leva dez anos sen negociarse e que agora as empresas se negan a actualizar as percepcións económicas segundo o establecido no seu artigo 7.
O 6,5% é irrenunciábel
Cómpre lembrar que o convenio colectivo contén unha cláusula de revisión salarial do IPC real, polo que, malia estar sen actualizar no resto do articulado, as traballadoras puideron incrementar os seus cativos salarios ano a ano con esa referencia para non perder poder adquisitivo. Até este ano 2022, cando as empresas se negaron a asumir o abono do 6,5% correspondente ao IPC de 2021. .
![](imaxes/adaptadas/780/files/novas/2022/06/30/SAF/22-06-30_ConcentracionSAF_Teo_08.jpg)
De feito, aínda que en Galiza hai 250 empresas rexistradas de Servizo de Axuda no Fogar para as que traballan unhas 8.000 persoas, o 95% mulleres, só unhas poucas compañías actualizaron os soldos ao IPC real. O resto ou non pagou ou está aboando a metade (un 3,1% ou 3,2%), un incremento irrisorio cando estamos falando de salarios cativos e tendo en conta o medre imparábel da carestía da vida.