Sobe o desemprego, cae escandalosamente a afiliación á Seguridade Social e as mulleres volven ser as máis castigadas

O ano 2024 arrinca en Galiza cunha forte caída da afiliación á Seguridade Social. Hai, de feito, 11.751 persoas afiliadas menos con respecto ao mes de decembro, un descenso do 1,1%. Dáse, ademais, a circunstancia de que este é o sexto mes consecutivo no que se produce esta caída. Xunto a isto, aumenta en 1.957 o número de persoas rexistradas como paradas no SEPE, un 1.2% máis. Todo o desemprego correspóndese co sector servizos, co agravante de que o 73% das novas persoas desempregadas son mulleres.

Para o secretario confederal de Emprego e Industria este datos veñen confirmar o que a CIG viña advertindo, “que o que trouxo a reforma laboral foi un cambio no modelo de precariedade baseado na contratación a tempo parcial e nos sectores máis feminizados e con peores condicións”.

Persoas desempregadas por provincias

Fonte SEPE

Así se constata no feito de que o incremento do paro se produza no sector Servizos, onde medrou un 2%, e que afecte fundamentalmente ás mulleres, que son o 73% das novas desempregadas, “castigando, unha vez máis, a este colectivo que é o que sofre os peores contratos e os peores salarios nos peores sectores”, apunta González Sío.

Persoas desempregadas por sectores

Fonte SEPE

Os datos confirman ademais que o desemprego entre as mulleres medrou un 1,6%, fronte ao 0,8% que aumentou entre os homes.

Persoas desempregadas segundo sexo

Fonte SEPE

O desemprego incrementouse en todas as provincias pero con diferenzas salientables: en Pontevedra o incremento foi cativo, tan só un 0,2% máis de persoas desempregadas. Pola contra, en Lugo o incremento foi do 3,5%.

“Tamén se confirma como aumenta o descenso de fixos descontinuos nos traballadores temporais e nos traballadores a tempo parcial”, apunta o secretario confederal de Emprego, quen denuncia que “é a nova cara que ten a precariedade e que trouxo a reforma do ano 21”.

Preocupante caída da afiliación á Seguridade Social

González Sío subliña a preocupante caída da afiliación á Seguridade Social, que xa levaba baixando seis meses seguidos- Por iso denuncia a propaganda por parte do Estado español. “O Estado español e Galiza son os únicos territorios de toda Europa que teñen taxas de paro de dous díxitos e esta é unha situación abafante, porque dámos por feito que a baixada do paro cunha taxa tan alta sexa normal trasladándose á cidadanía a idea de que podemos vivir con esta taxa de paro. Por iso exixe “cambiar o sistema de emprego e atacar a precariedade derrogando as reformas”.

Afiliación á S.S. segundo provincia

Fonte: Seguridade social

Xunto a isto, González Sío denuncia que “o contrato indefinido é cada vez máis inestable, xa que os despedimentos por pasar o período de proba multiplicáronse por tres e o número de despedimentos de traballadores é un 20% máis, mentres que a indemnización que levan e dun 34,9% menos”.

Nese sentido subliña que as traballadoras e traballadores tiñan antes unha indemnización media de 10.000 euros e agora de 6.500 euros. Polo tanto, afirma, “ser fixo xa non é garante de ter un traballo estable e as indemnizacións son peores por cada vez cobramos menos e temos traballo en peores condicións”.

• afiliación
• paro
• paro rexistrado
• precariedade
• Seguridade Social
• SEPE