![Confederación Intersinidical Galega](/assets/cig/2022/logos/cig.png)
Seguimento total na 1ª xornada de folga na conserveira Albo de Celeiro
![](assets/images/d/22-06-27_FolgaAlboCeleiro_011-a8c94e4d.jpg)
As traballadoras e os traballadores da conserveira Albo de Celeiro secundaron este luns a primeira xornada de folga parcial contra o peche da fábrica e a proposta de traslado do persoal ás novas instalacións do polígono de Salvaterra-As Neves. Coincidindo co paro de dúas horas o persoal saíu en manifestación dende a planta até a estatua á Xente do Mar en defensa da continuidade produtiva e o mantemento de todos os postos de traballo en Celeiro.
![](imaxes/adaptadas/780/files/novas/2022/06/27/Albo/22-06-27_FolgaAlboCeleiro_014.jpg)
Na manifestación, que se produce na véspera dunha nova reunión da comisión de negociación do expediente de mobilidade coa empresa, as traballadoras e traballadores contaron co apoio de veciños e veciñas, representantes políticos e de membros do comité de Alcoa, que lles quixeron trasladar a súa solidariedade nesta loita.
A decisión da compañía Shanghai Keichuang supón un novo golpe á industria e ao emprego da Mariña e afonda no esmorecemento progresivo que sofre a comarca, que hai menos dun ano asistía ao desmantelamento de Vestas e á destrución de máis de cen postos de traballo.
Por iso, a CIG reivindica a intervención decidida da Xunta de Galiza para evitar que se consolide esta desfeita que suporía deixar na rúa a máis de 42 persoas -a maioría mulleres cunha idade media que supera os 50 anos- e a desaparición definitiva dun sector como o da conserva, que foi tan importante para a comarca.
![](imaxes/adaptadas/780/files/novas/2022/06/27/Albo/22-06-27_FolgaAlboCeleiro_07.jpg)
Neste senso, a CIG reitera que o expediente de mobilidade formulado pola empresa non constitúe unha alternativa aceptábel para o 90% as traballadoras, que non poden asumir este cambio a máis de 270km dos seus fogares polo custe económico que lles carrexa, polos baixos salarios que se cobran e polas propias situacións familiares e persoais.
A CIG reclámalle á empresa que dea marcha atrás nos seus plans de peche e manteña a produción na planta de Celeiro, tendo en conta que a factoría é viábel e ten carga de traballo suficiente para soster os actuais niveis de emprego.
Calendario de mobilizacións
As traballadoras e traballadores de Albo teñen convocado o seguinte calendario de mobilizacións:
- Mércores 29 de xuño, folga parcial e manifestación ás 10 horas dende a porta da fábrica até a Delegación Territorial de Pesca.
- Luns 4 de xullo, concentración ás 20h diante do Concello de Viveiro.
- Martes 5 de xullo, folga parcial de 13 a 15h e concentración ás 13:20h na estrada de Area (fronte ao restaurante Louzao).
- Mércores 6 de xullo, folga de 10 a 12h e concentración diante da fábrica.