![Confederación Intersinidical Galega](/assets/cig/2022/logos/cig.png)
Seguimento total dos paros no almacén de Zara Loxística en defensa dos dereitos e carga de traballo estábel
![](assets/images/6/2024-05-13_ParosZaraLoxistica_05-62ba6996.jpg)
Despois da multitudinaria manifestación deste domingo, os traballadores e as traballadoras de Zara Loxística están secundando este luns paros de media xornada por cada quenda laboral en defensa dos seus dereitos e para reclamarlle a Inditex carga de traballo estábel no almacén. Os paros tiveron un seguimento de practicamente o 100% do persoal na quenda de noite a na da maña.
![](imaxes/adaptadas/780/files/novas/2024/05/13/paros%20almacen%20zara/2024-05-13_ParosZaraLoxistica_01.jpg)
Ademais, para dar máis visibilidade á súa loita, o persoal concentrouse a media mañá nas instalacións de Sabón e pendurou no peche do almacén cartaces reivindicativos reclamando carga de traballo, respecto aos calendarios laborais pactados e chamando á mobilización na defensa dos dereitos.
Na xornada deste martes, os paros parciais repetiranse no mesmo formato e dende o comité xa avanzaron que as protestas continuarán até que Inditex sente negociar, rectifique a modificación unilateral dos calendarios e garanta carga de traballo estábel para o almacén de Sabón.
A este respecto, Roberto Pérez, delegado da CIG no comité e secretario da CIG-Servizos da Coruña, lembra que hai 20 anos o persoal tivo que loitar para conseguir unhas condicións laborais dignas e acadar uns calendarios que a empresa, de maneira unilateral e sen motivo, agora incumpre.
![](imaxes/adaptadas/780/files/novas/2024/05/13/paros%20almacen%20zara/2024-05-13_ParosZaraLoxistica_00.jpg)
Advirte do perigoso desta deriva de Inditex, pois este ataque aos dereitos laborais hai que enmarcalo no abandono progresivo do almacén loxístico de Arteixo en beneficio doutras plataformas ás que a multinacional está derivando actividade e nas que está facendo investimentos millonarios, mentres as instalacións de Sabón levan meses arrastrando unha alarmante falta de carga de traballo.
Por iso, insta a continuar na mobilización até que Inditex sente negociar, cumpra cos acordos laborais e garanta o futuro do almacén loxístico.