Seguimento masivo da folga xeral nas Pontes en demanda dunha transición xusta, alternativas industriais e na defensa do emprego
As Pontes vive este mércores unha xornada de folga xeral na defensa do emprego, para esixir alternativas industriais que doten de futuro a comarca e para reclamar a Endesa que achegue propostas e que se involucre na busca de medidas que minimicen o impacto económico e laboral que terá o peche da central. Hoxe a actividade no comercio, a hostalería e os polígonos está completamente parada (nin sequera se traballou nas obras de adaptación de central), as Administracións funcionan en servizos mínimos e as aulas dos colexios ficaron baleiras.
Nesta exitosa xornada de folga, centos de veciñas e veciños partían pouco despois das nove da mañá cara a Madrid en once autobuses, aos que se sumaron os autocares procedentes de distintos concellos galegos e doutras localidades do estado afectadas polo peche das térmicas, e as ducias de persoas que se trasladaron nos seus vehículos particulares ou en tren. Ademais, uns 130 camións xa saíran o martes a primeira hora da tarde destino Madrid, onde agardaron polo resto da caravana para mobilizarse diante do Congreso.
Previamente, un piquete informativo despregouse dende as seis da mañá para comprobar o grao de seguimento do paro, nunha vila hoxe caracterizada pola falta de actividade en todos os sectores, con industrias e comercios pechados e sen apenas movemento nas rúas. A única nota discordante foi a oficina do BBVA, que abriu con normalidade para sorpresa de todos e todas. De feito, para mañá está convocada unha concentración, ás 13 horas, diante desta oficina para amosar o rexeitamento a esta actitude de esquirolaxe.
Exemplo da necesidade de mobilizarnos
Por volta das catro da tarde, miles de persoas comezaban a encher os arredores do Congreso dos Deputados e das Deputadas, custodiado por un numeroso dispositivo policial, portando faixas en demanda dunha transición enerxética xusta, en defensa do emprego e pedindo alternativas que doten de futuro industrial ás Pontes e a súa comarca. De xeito paralelo, realizábase unha concentración diante do casa do Concello das Pontes na que, malia a intensa choiva, participaron unhas 500 persoas.
Na concentración de Madrid participaron tamén o secretario xeral da CIG, Paulo Carril, o secretario confederal de Emprego, Fran Cartelle, e o secretario comarcal da CIG-Ferrol, Manuel Grandal. Carril salientou o enorme éxito desta xornada de folga "que é un exemplo da necesidade de mobilizarnos para conseguir unha transición xusta e que non faga pagar a Galiza as consecuencias do proceso de descarbonización da economía sen ofrecer ningunha alternativa, despois de décadas de espolio dos nosos recursos".
O secretario xeral da CIG destacou que esta folga xeral supón un paso máis no camiño da defensa do noso tecido produtivo e do seu futuro ante a grave crise da industria que atravesa Galiza e que ameaza con converternos "nun verdadeiro deserto industrial" se non logramos reverter este proceso.
Transición que non deixe atrás a comarca
No marco da mobilización en Madrid, o denominado "comité de crise" mantivo encontros con varios representantes dos grupos políticos para explicar a situación dramática na que queda a comarca ante o peche da central e demandar unha transición ordenada e xusta acompañada de alternativas industriais á parada produtiva da central.
De igual xeito, demandouse dos grupos que esixan de Endesa, mentres non se clarifique o escenario no que van quedar as instalacións, un compromiso en firme co seu persoal propio e co persoal das súas auxiliares e co proceso de reindustrialización da comarca, ao que, por certo, está obrigado polo peche da central.
