Queremos Galego chama á mobilización masiva este domingo en Compostela ao berro de "Lingua vital xa"
Máis de 20 entidades de Queremos Galego presentaron esta mañá en rolda de prensa os pormenores da manifestación "unitaria" a favor da lingua galega que percorrerá as rúas de Compostela este domingo, día 23 de febreiro, baixo o lema Lingua Vital xa. Celia Armas, coordinadora de Queremos Galego, explicou que porá o ramo da marcha na praza do Obradoiro unha das revelacións da música galega contemporánea, Mondra. E pediu que a xente acuda con pandeiretas e percusión galega, para celebrar tamén a música tradicional.
A marcha sairá ás 12h da Alameda pola rúa da Senra, Praza de Galiza, Porta da Mámoa, Praza do Toural, rúa do Vilar, Praza das Praterías e Rúa de Fonseca, ata concluír na praza do Obradoiro, onde se lerá o manifesto e intervirá o portavoz de Queremos gaelgo e presidente da Mesa, Marcos Maceira. Será nun acto conducido por Xurxo Souto que contará, tamén, coas actuacións de Carapaus e da asociación de gaiteiros e gaiteiras galegas interpretarán a Alborada para Rosalía.
Armas anunciou que acompañarán a marcha delegacións de Cataluña, do País Vasco e unha representación da Rede Europea pola Linguas, ONG con carácter consultivo da ONU e do Consello de Europa, con moita preocupación pola situación do galego como caso único no Estado español de lingua atacada polo seu propio goberno.
A coordinadora de Queremos Galego recordou, asimesmo, que mais de 28 localidades ofrecen bus para facilitar o desprazamento a Santiago e animou as persoas interesadas a consultar a páxina web de Queremos Galego, para ver se nas súas localidades hai sitio aínda. "A marcha deste domingo é froito do traballo desenvolvido en 24 plenarios comarcais que se celebraron ao longo do país", recordou, "e estes plenarios manterán a súa actividade". "Galiza está viva", afirmou, "porque a súa lingua é vital. Todos á rúa o próximo 23 de febreiro!"
Unidade arredor da lingua
O voceiro da Mesa, Marcos Maceira, salientou que a manifestación do 23F é "unha proposta clara de unidade arredor da lingua". E recordou que existen uns "puntos mínimos compartidos por centos de entidades sociais e miles de persoas para mellorar a situación do galego": calendario para o cumprimento e avaliación do PXNLG, cumprimento da lei Paz Andrade, da Carta europea das linguas e das resolucións do Consello de Europa, derrogación do decreto contra o galego no ensino, oferta positiva en todos os servizos públicos e privatizados, etc.
Neste sentido, Maceira, recorda que "a manifestación terá lugar días despois de desenmascarar o pacto polo enterro do galego que a Xunta pretendía levar a cabo". "Reclamamos un proceso transparente, plural, participado e con vontade de aplicación e encontrámonos cunha convocatoria dunhas supostas comisións escollidas unilateralmente", denuncia o voceiro da plataforma de defensa da lingua, "con toda opacidade e vetando a participación de calquera das entidades dos diferentes sectores implicados no PXNLG".
"Como pensan falar do ensino vetando ANPAS, Sindicatos, movementos de renovación pedagóxica e estudantes?", lamenta Maceira. "Como pensan falar de actividades económicas vetando sindicatos e organizacións de consumidores?", engade, "ou de cultura, vetando a participación o sector do audiovisual, ou a asociación de escritores e escritoras?". "Da administración sen o persoal técnico de normalización?", remata. "A única explicación é o compromiso inequívoco destas entidades que hoxe nos acompañan coa lingua galega", en referencia ás máis de 20 entidades de todos os sectores que participaron na rolda de prensa e apoian a manifestación do próximo domingo.
Marcos Maceira referiuse, tamén, á lei de intelixencia artificial que anula a oficialidade do galego, á lei da CRTVG que abre a porta a deixar de usar o galego, ao concurso de adxudicación dos campamentos de verán que non contempla o coñecemento de galego ou á negativa do presidente da Xunta a reclamar a oficialidade do galego na UE. E afirmou que "se o 17 de novembro conseguimos que a Xunta e o PP reaccionasen, este 23 de febreiro imos comezar a reverter a situación do galego co compromiso da Xunta ou sen el".
