![Confederación Intersinidical Galega](/assets/cig/2022/logos/cig.png)
Persoal sanitario dos PAC formaliza a reclamación de calendarios laborais axustados coa xornada
![](assets/images/7/18-07%2031%20SinaturasPACVigo01-f0828af7.jpeg)
O persoal sanitario dos Centros de Atención Primaria (PAC) galegos, que se atopan en pé de guerra en defensa das súas condicións laborais, levaron a cabo hoxe unha entrega de reclamacións individuais nas Xerencias de cada área sanitaria reclamando calendarios axustados coa xornada ordinaria que ten que facer cada profesional.
![](imaxes/adaptadas/780/files/novas/2018/07/31/18-07%2031%20SinaturasPACOurense.jpeg)
Con estas arredor de 400 solicitudes formais presentadas demandan a elaboración inmediata de calendarios laborais axustados á xornada ordinaria que figura no pacto 2008 de Ordenación e Provisión de postos de traballo no ámbito da Atención Primaria do Sergas. Deste xeito figuraría por separado a xornada obrigatoria e a voluntaria, o que garantiría que cada traballador/a puidese gozar dos días libres que lle corresponde.
Dende o colectivo denuncian a deixadez da Administración á hora de negociar melloras na asistencia sanitaria e nas condicións laborais dos traballadores/as. Critican que o departamento autonómico está a dilatar de xeito inexplicábel o proceso e non ofrece posibilidades de avance.
Neste senso, as organizacións sindicais con representación na mesa sectorial do Sergas -entre elas a CIG- lamentan que a convocatoria da Comisión Técnica de PAC non se tivese celebrado antes de rematar o mes de xullo. Consideran que, están intentando demorar as negociación para que remate o verán e advirten que isto tería como consecuencia o incremento das mobilizacións do colectivo afectado.