![Confederación Intersinidical Galega](/assets/cig/2022/logos/cig.png)
Persoal dos centros sociaculturais concéntrase diante do concello de Santiago en demanda dunha negociación
![](assets/images/7/2022-03-31_concentracion_centros_civicos_Compostela-141a3887.jpg)
Persoal da Rede de Centros Socioculturais de Santiago concentrábase esta mañá na Praza do obradoiro, diante do concello, para reclamar do goberno municipal seren escoitados e que se abra a unha negociación coa representación sindical para garantir os seus postos de traballo preservando os dereitos laborais.
Segundo explica o comité de empresa, o pasado mes de outubro do 2021, “con retraso e sen contar en ningún momento coa opinión, proposta e parecer das traballadoras e traballadores do servizo”, o Concello de Santiago publicou os pregos para as novas contratacións que xestionarán a Rede de Centros Socioculturais do Concello de Santiago.
A súa primeira sorpresa foi que segundo estes, o servizo será dividido en catro lotes: animación, novas tecnoloxías, bibliotecas e atención ó público. “Catro lotes para catro empresas. Catro lotes de traballadoras e traballadores que vén como a súa forza sindical e negociadora ten os días contados ó ser totalmente esfarelados”.
O comité sinala que “as sorpresas foron máis”, algo que consideran “esperable” tendo en conta que o Concello “nunca recibiu nin escoitou as propostas e peticións” deste comité durante a elaboración de ditos pregos.
Máis precariedade
Así, denuncia que “nun alarde de oligarcas municipais, o concello de Santiago, con Bugallo á fronte, o concelleiro Javier Fernández e o responsable de Centros Socioculturais, Enrique Vázquez Naveira, elaboraron e publicaron uns pregos que levan ó persoal do servizo á máis profunda precariedade, que xa non era pouca”.
Neste sentido asegura que as novas contratacións sairán máis baratas porque non se axustarán ao convenio propio; que se reducen horas “nas que sobra parte do persoal que xa está en activo, neste momento, e debe ser subrogado por lei; que figuran esixencias de formacións específicas que até o momento non se viñan esixindo; que se crean catro coordinacións diferentes que non están contempladas no orzamento e que non se toman en consideración, na partida económica, os requisitos de suba salarial do convenio propio.
A isto engaden a asignación obrigada do lote de Atención ao público a un Centro Especial de Emprego que require un mínimo porcentual de persoas con discapacidade. Temas que, afirman, “conducen, sen remedio, ao despedimento e á precarización do persoal en activo no servizo”.
Ningunha empresa concursou ao lote de Novas Tecnoloxías
O comité apunta ademais que ningunha empresa quixo concursar ao lote de Novas Tecnoloxías, principalmente pola ausencia dun orzamento xusto para manter este servizo. “Ante este lote deserto, e malia as numerosas peticións por parte do comité, o Concello non responde a dúbidas, nin aclara a situación”.
Por iso o comité pregúntase que pasará con este servizo e se terán aínda máis despedimentos dos agardados. Unha situación fronte á que demandan que se remunicipalice un servizo que é de toda a cidadanía.