• Nova

Persoal dos centros cívicos concéntrase no Concello de Santiago en demanda de solucións

A folga fica suspendida en agosto, pero xa advirten que o conflito continuará en setembro
Compostela - 29 Xul 2022

Persoal dos  Centros Socioculturais de Compostela concentrouse este venres diante do Pazo de Raxoi en defensa dos seus dereitos e para que as novas concesionarias manteñan o convenio colectivo propio. A protesta realizouse coincidindo coa última xornada da folga convocada para este mes de xullo, que rexistra un seguimento de máis do 50%, a pesar das novas contratacións do último mes.

As traballadoras e traballadores Serviplus e Nor’integra (dúas das empresas adxudicatarias do servizo) acordaron facer unha pausa temporal, xa que en agosto os centros pechan e o persoal vai de vacacións. Non obstante, xa avanzaron que o conflito non rematou e que a loita continuará no mes de setembro, data para a que están preparando unha nova convocatoria de folga.

"Seguimos solicitando das empresas Serviplus e Nor’integra a mellor vontade para poder chegar a un acordo de mínimos, e seguimos solicitando, por parte deste Concello, unha intervención neste conflito que poida achegar solucións rápidas deixando de danar un servizo que é de todas e todos", subliñan.

A este respecto, o persoal apunta que o conseguido até o momento "non é grazas ao alcalde Bugallo nin ao  concelleiro de centros Javier Fernández". De feito foi a mobilización e a loita o que posibilitou alcanzar un acordo de mínimos coa empresa Atlantic Ponte para o Lote II (bibliotecas), servizo no que xa se desconvocou a folga a semana pasada.

Sobre os problemas que se rexistran nos centros, o persoal destaca:

-Unha persoa non subrogada por Nor’integra, despedida, da que reclaman que se recoñeza a súa antigüidade.

- Dúas persoas ás que Nor’integra lle reduciu a xornada nun terzo da súa orixinal sen que o concello movese un dedo por saber da súa situación.

-Un centro especial de emprego que, de ningún modo, está disposto a mellorar as xornadas das persoas subrogadas nin a respectarlle os seus dereitos de subrogación.

-Persoal de Serviplus que realizaba tarefas correspondentes a outros lotes e que se descoñece como vai ser subrogada, se lle van reducir horas (as que corresponden a outros servizos), ou se van prescindir dos seus servizos.

- Máis do 50% do persoal que até setembro-outubro non serán reincorporado ao servizo e non sabe, aínda, as problemáticas que van xurdir coa empresa nin se as van chamar.

- Un concello que non está colaborando na resolución do conflito entre persoal e empresas, a pesar de ser o máximo responsábel desta desfeita.