Persoal da empresa de automoción INDEA de Ourense (antiga Hispaplastic) desenvolveu hoxe unha concentración diante das instalacións da compañía no polígono de Pereiro de Aguiar ao berro de “enfermar non é un delito” para reclamar a readmisión dunha compañeira despedida por causa dunha lesión laboral.
Dende a CIG-Industria explican que a compañía, agora propiedade da transnacional SAPA, rescindiulle o contrato unha vez que a empregada -afectada de epicondilite, unha lesión causada polo traballo repetitivo na cadea de inxección- solicitou unha adaptación do seu posto. A empresa negoulle a adaptación e, semanas despois, ingresoulle un finiquito e unha carta de despedimento obxectivo por ineptitude sobrevida. “Chámanlle ineptitude ao que eles mesmos fixeron: destruír a súa saúde”, denuncian.
Na central sindical lembran que a traballadora desenvolveu unha lesión musculoesquelética crónica pola natureza do seu traballo, “polo que pediu o que é un dereito: a adaptación do posto. Pero a empresa negoulle ese dereito e converteuna en culpábel da súa propia lesión para xustificar o despedimento”.
Unha actuación empresarial que a central non considera xestión de recursos humanos senón “violencia laboral”. Neste senso, sinalan que “o patrón é claro: SAPA absorbeu Megatech, que ten outra planta de inxección de plástico xusto en fronte de INDEA. Nos próximos meses haberá axustes de persoal, cambios de categoría e movementos entre empresas. Esta traballadora é a primeira, pero non vai ser a última se non nos opoñemos a esta política empresarial”.
Polo que durante a mobilización demandouse a readmisión inmediata da traballadora despedida, a adaptación real dos postos de traballo sen represalias e que as lesións musculoesqueléticas derivadas do traballo repetitivo sexan recoñecidas e tratadas como enfermidades profesionais, así como garantías fronte aos procesos de reestruturación nos que está inmersa a compañía.