Persoal de Atento mobilízase contra a política de deslocalización de Movistar
Traballadoras e traballadores de Atento concentráronse este venres ás portas da empresa para denunciar a política de deslocalización de Movistar e a destrución de emprego que isto supón nas plataformas galegas. O próximo martes, 1 de abril, a CIG ten convocadas dúas concentracións ás 12:30h na porta de Atento (rúa Juan Flórez) e ás 13:00h diante da tenda Movistar da Praza de Pontevedra, no marco da campaña en defensa dos postos de traballo nun sector que na cidade da Coruña dá emprego a máis de 3.500 persoas.
Nos últimos anos, Atento está destruíndo emprego na Coruña para levalo á plataforma que ten en Colombia. “De case 1.500 postos de traballo quedan menos de 400, e esta práctica continúa”, advirte o secretario comarcal da CIG-Banca, Sergio Toucedo. A última decisión da empresa é a deslocalización do servizo de atención de avarías na quenda de noite.
“Este servizo, que hai máis de 25 anos que se atende exclusivamente dende A Coruña dando a posibilidade de atención en galego, pechará as súas portas de 24:00 a 07:00. A experiencia, antigüidade e calidade do servizo que prestaban compañeiros e compañeiras é deixada a un lado só polo interese de Atento de aforrar custos e aumentar os seus ingresos”, denuncia Toucedo.
Apunta á “complicidade necesaria” de Movistar nesta decisión, xa que, sendo a contratista dos servizos, “lonxe de preocuparse por dar unha atención diferenciada e de calidade, só lle interesa aumentar as súas arcas coas enormes facturas que cobran, investindo 0€ en atención ás persoas usuarias”. Unha situación similar dáse noutra gran empresa do sector na Coruña, ABAI, que pasou de contar con 1.000 persoas traballadoras en 2016 a ter na actualidade menos de 500.
Campaña polo emprego
Nesta realidade, a CIG acordou iniciar unha campaña polo mantemento do emprego no sector, no marco da que xa mantivo unha reunión co BNG e na que promoveu a aprobación dunha declaración institucional polo pleno municipal da Coruña contra os procesos de deslocalización e na que se insta ao Goberno español a regular neste sentido.
Toucedo lembra que o Estado español é accionista maioritario de Movistar, polo que debera impulsar as ferramentas necesarias para garantir o emprego de calidade e evitar a deslocalización dos postos de traballo. “Non pode ser que o Goberno consinta a estas multinacionais destruír emprego da noite á mañá”, subliña.
Indica que non se trata só de postos de traballo, senón tamén de garantir a proximidade e a calidade na atención para toda a cidadanía; o dereito a termos atención en galego; e garantir que se cumpre a lexislación en materia de protección de datos. Ademais, refire que, ante o avance das tecnoloxías, cómpre o control do uso da IA, os automatismos e a autoxestión na atención á clientela.
“Na CIG temos claro que só mediante a denuncia pública nas rúas lograremos que volvan os postos de traballo á nosa terra. Queremos atención en galego, de calidade, dada por persoas con anos de experiencia e que por culpa de ERE, mobilidades xeográficas, dificultades na conciliación, e outras ferramentas de presión, foron obrigadas a perder o seu traballo”. Porque, insiste, “as chamadas non desapareceron, senón que foron deslocalizadas ao outro lado do Atlántico”.
