![Confederación Intersinidical Galega](/assets/cig/2022/logos/cig.png)
Persoal de Abanca e veciños/as de Ourense mobilízanse polo peche da oficina da rúa San Rosendo
![](assets/images/1/21-03-12_Protesta_Peche_Oficina_Abanca_Ourense_01-66f98f61.jpeg)
Persoal de Abanca e veciños/as de Ourense mobilizáronse esta mañá para rexeitar o peche da oficina situada no número 16 da rúa San Rosendo, unha convocatoria lanzada pola sección sindical da CIG co obxectivo de denunciar que Abanca está a pechar sucursais rendíbeis, deixando sen servizo a unha parte da poboación e remitindo a clientela a oficinas xa colapsadas, ademais de poñer en perigo numerosos postos de traballo.
![](imaxes/adaptadas/780/files/novas/2021/03/12/Protesta%20peche%20oficina%20Abanca%20Ourense/21-03-12_Protesta_Peche_Oficina_Abanca_Ourense_02.jpeg)
A isto hai que sumar as restricións nos servizos de caixa a partir de xuño anunciados polo banco. No caso da oficina de San Rosendo, a clientela será trasladada á sucursal da Avenida das Caldas, nas que as colas teñen provocado numerosas queixas, e que pechará ao publico ás 11:00 horas a partir de xuño. Durante a mobilización de hoxe berráronse consignas como “Non ao peche” ou “Aquí enchen as sacas, que levan a Caracas”, en referencia á orixe venezolana do presidente de Abanca, ao tempo que se formou un mosaico con letras coa frase “Non ao peche”.
Dende a CIG-Abanca critican que todas estas medidas anunciadas pola dirección do banco, que pretenden forzar a clientela a optar pola banca dixital, provocan a marxinación financeira de persoas con dificultades para operar na banca dixital, ou incluso nos caixeiros, con especial afectación para as persoas maiores.
![](imaxes/adaptadas/780/files/novas/2021/03/12/Protesta%20peche%20oficina%20Abanca%20Ourense/21-03-12_Protesta_Peche_Oficina_Abanca_Ourense_05.jpeg)
Destrución de emprego
“Este tipo de peches de centros de traballo rendíbeis, as restricións de servizo e as colas supoñen un problema laboral e anticipan a destrución de novos postos de traballo. Por iso temos realizado outras mobilizacións, como a do 1 de marzo en Celeiro, que contou co apoio da veciñanza que reclama que non peche a oficina”, lembran.
Noutros casos, coma en Nigrán, a propia veciñanza se ten mobilizado contra o peche da oficina decidida polo banco. “Está en xogo que territorios cada vez máis amplos podan quedar sen servizos financeiros e que a marxinación afecte á poboación con menores ingresos ou a que ten maior dificultade para o uso das novas tecnoloxías”.
Todo isto fixo que a CIG convocase a concentración que tivo lugar hoxe e na que se reclamou que se manteña aberta a oficina de San Rosendo, que se amplíen os postos de atención presencial para evitar colas e que non se poñan en marcha maiores restricións de servizo. “Porque dar servizo é a garantía de emprego”, rematan.