Persoal das residencias da terceira idade privadas clama en Vigo por unhas condicións laborais dignas
As persoas traballadoras das residencias da terceira idade privadas continuaron hoxe coa campaña de mobilizacións convocada pola CIG-Servizos nas sete comarcas para reclamar un convenio colectivo que dignifique as condicións laborais tras a proposta insuficiente achegada pola patronal. Nesta ocasión a protesta tivo lugar diante do centro de DomusVi na rúa Fátima, mentres que o vindeiro mércores 18 trasladarase a Ourense.
Persoal do sector acordou nas asembleas promovidas pola central sindical levar a cabo estas concentracións para denunciar a importante perda de poder adquisitivo (do 7,8%) dende a sinatura do anterior convenio (2020-2023) por parte de CCOO e UGT.
Ao que hai que sumarlle o feito de que a suba do SMI aplicada polo Goberno central neste período foi do 24,4%, o que provocou que as categorías máis baixas do convenio non cheguen ao SMI e gran parte delas estean só 10 euros por enriba en 2024. “Os salarios estanse a empobrecer dun xeito brutal, mentres os beneficios das sete principais empresas do sector ascenderon a 1664 millóns de euros anuais”, detallan dende a CIG-Servizos.
Pois neste contexto a patronal fixo unha proposta de convenio que as persoas traballadoras consideran insuficiente, xa que lonxe de frear o empobrecemento dos soldos afonda máis nel. “Empeora as condicións económicas do persoal de cara ao futuro e tampouco establece avances suficientes nas condicións sociais”.
Na central sindical censuran que isto esta a acontecer co “silencio cómplice” da Xunta, “á que se lle enche a boca falando do modelo de coidados e residencias mentres perpetúa un sistema de explotación das persoas traballadoras baixo o xugo de transnacionais e fondos de investimento que só miran o seu beneficio económico e aos que nada lles importa nin as persoas traballadoras nin as usuarias”.
En consecuencia, as asembleas de traballadoras/es expresaron “o seu non rotundo” á proposta do empresariado e a vontade de dicirlle “alto e claro” que “non estamos dispostas/os a seguir recollendo migallas e vivindo na miseria” porque “queremos unhas condicións de traballo dignas acordes a un traballo que é esencial para a sociedade”.
E optaron por iniciar mobilizacións, que até o de agora desenvolvéranse en Pontevedra, Lugo; Ferrol, Santiago e A Coruña. Mentres que hoxe se trasladaron a Vigo ao berro de “Non somos escravas, somos traballadoras” e “Con esta patronal o convenio vai moi mal”, e o mércores 18 farano en Ourense, ás portas da residencia de DomusVi en Barbadás ás 11:45 horas.
Paralelamente, a CIG-Servizos está a desenvolver tamén traballo institucional para lograr unha mellora das condicións laborais do persoal dun sector no que as principais empresas contan con importantes contratos coas administracións públicas. Mañá mesmo delegadas/as da central sindical nas residencias privadas e responsábeis da CIG-Servizos manterán unha xuntanza co grupo parlamentario do BNG en Santiago para abordar a elaboración dunha pregunta dirixida á Xunta “porque o Goberno galego ten moito que dicir neste conflito”.
