![Confederación Intersinidical Galega](/assets/cig/2022/logos/cig.png)
Os traballadores do transporte de RSU marchan a pé desde Mesón do Vento até as instalacións de Sogama
![](assets/images/e/2019-05-24_marcha_SOGAMA_005-7faa321e.jpg)
Os traballadores do transporte de Residuos Sólidos Urbanos protagonizaron esta mañá unha marcha a pé de 6 quilómetros, desde o Mesón do Vento até as instalacións de Sogama no concello de Cerceda. Levan, a esta altura, 39 días en folga indefinida, sen que, polo momento se lle dera unha solución ao conflito, que pasa pola readmisión dos 8 compañeiros despedidos e a fin das represalias.
![](imaxes/adaptadas/780/files/novas/2019/05/24/Marcha%20a%20pe%20dos%20traballadores%20de%20Pacholo%20S.L/2019-05-24_marcha_SOGAMA_002.jpg)
A marcha foi convocada para evidenciar os incumprimentos en materia laboral e medio ambiental da subcontrata do transporte de residuos e para denunciar os despedimentos que a empresa decidiu efectuar contra os traballadores que os denunciaron.
O persoal demanda a intervención de Sogama e a consellaría de Medio Ambiente, porque entende que desde a administración non se pode permitir que se dean incumprimentos deste tipo nunha empresa pública. Máis cando foi precisamente por reclamar que non se produciran polo que a empresa concesionaria optou por represaliar ao persoal, o que levou á convocatoria desta folga indefinida.
Xuntanza no Consello Galego de Relacións Laborais
A próxima semana celebrarase unha xuntanza no Consello Galego de Relacións Laborais, para a que o comité de folga, en representación dos traballadores, demanda a implicación real da consellaría e do propio Presidente de Sogama, para rematar cun conflito que está afectando ao servizo, ao teren contratado para realizalo a empresas sen experiencia, nin as medidas de seguridade axeitadas.
![](imaxes/adaptadas/780/files/novas/2019/05/24/Marcha%20a%20pe%20dos%20traballadores%20de%20Pacholo%20S.L/2019-05-24_marcha_SOGAMA_001.jpg)
Ademais, todos os grupos parlamentarios da oposición asinaron unha solicitude conxunta para que compareza, na Comisión de Medio Ambiente, Javier Domínguez Lino, presidente de Sogama, en relación á folga dos traballadores e aos incumprimentos en materia laboral e medioambiental que se están producindo neste servizo.
Pola súa banda o comité de empresa denuncia que as empresas públicas están contratando subcontratas para abaratar os custo en detrimento das condicións laborais.
Xuízo por vulneración do dereito á folga
O Tribunal Superior de Xustiza de Galiza fixou para o vindeiro día 27 de xuño o xuízo por vulneración de dereitos fundamentais, nomeadamente o dereito á folga, pola contratación doutras empresas para facer o traballo dos folguistas.