Os bombeiros/as de Vigo convocan folga por primeira vez na historia do servizo
Os bombeiros/as do Concello de Vigo rexistraron hoxe a convocatoria de folga indefinida a partir do vindeiro 14 de agosto ante a “situación límite” derivada da falta de persoal. As centrais promotoras da medida -CIG e CUT- contan co apoio da maioría dos traballadores/as: polo momento de 65 dos 102 efectivos/as en activo, “aínda que esta cifra podería aumentar nos próximos días porque máis compañeiros/as xa manifestaron a súa intención de sumarse”.
O representante da CIG nos bombeiros/as vigueses/as, Miguel Uclés, compareceu esta mañá en rolda de prensa para anunciar a convocatoria e explicar que a folga responde “a unha esixencia dos nosos/as afiliados/as e simpatizantes no servizo, que xa non aturan máis a situación límite na que nos atopamos como consecuencia da falta de persoal; non hai que esquecer que o servizo chegou a ter 150 efectivos/as e na actualidade somos pouco máis de 100”.
De feito, o 30% do cadro de persoal está de baixa por ansiedade ou doenzas físicas derivadas do exceso de traballo: prolongación das xornadas laborais, gardas de 48 horas seguidas, etc. Situación que se agrava polo feito de que case da metade dos bombeiros/as en activo ten máis de 55 anos (48 de 102). “Noutros servizos xa estarían en segunda actividade, pero no noso seguen en primeira liña”.
"Estamos a falar de cousas moi graves que poderían supoñer denuncias penais, como falsificación documental para xustificar o exceso de horas extra, explotación laboral e poñer en perigo os traballadores/as e o conxunto da cidadanía", asegura.
Sobre todo no que ten que ver cos novos/as bombeiros/as, que a pesar de atoparse aínda en periodo de formación xa os pasaron ás quendas, "non fan formación e están a traballar sen finalizar a formación e impoñéndolles o decreto de ampliación da xornada, chegando a facer até 48 horas seguidas e duplicando no mes a xornada normal".
Negociacións bloqueadas
“Tampouco hai garantías de que vaian a pasar a formar parte do servizo porque as bases da OPE están denunciadas e igual hai que repetir a convocatoria", lembra. Ademais, a negociación para convocar a oposición de 2019 está bloqueada.
Con respecto á xuntanza prevista para este luns coa concelleira de Persoal e Seguridade, á que acudirán xa como comité de folga, asegurou non agardar nada, “porque xa estamos fartos/as de falsas promesas”.
