O TSXG obriga a UVigo a pagar as retribucións íntegras ao persoal investigador Margarita Salas e María Zambrano
A sala do Social do Tribunal Superior de Xustiza de Galiza (TSXG) vén de estimar un segundo conflito colectivo presentado pola CIG-Ensino, logo do que xa gañou contra a UDC. Nesta ocasión é a UVigo a universidade condenada a pagar integramente as retribucións que lle corresponden cobrar ao persoal contratado con cargo aos programas Margarita Salas e María Zambrano.
O sindicato, maioritario no conxunto das tres universidades galegas, amosa a súa satisfacción por este novo pronunciamento do alto tribunal galego e, tan só á espera da resolución do terceiro conflito colectivo relativo a este persoal investigador na USC, demanda dos equipos reitorais un cambio á hora de afrontar os conflitos provocados, primeiro, por unha mala praxe, como agora confirman as sentenzas e, segundo, pola negativa a sentarse a negociar e buscar acordos.
Neste sentido, a CIG-Ensino lembra que inicialmente propuxo unha arbitraxe para evitar a vía xudicial e que só se acudiu a esta tras obter a negativa das tres universidades por resposta.
A sentenza á UVigo reafirma os criterios da previa coa UDC
As conclusións do TSXG, na liña da sentenza anterior e do que demandaba a CIG-Ensino, son as seguintes:
- Declara nula la práctica da UDC de detraer do importe das axudas Margarita Salas e María Zambrano a cota empresarial á Seguridade Social, para determinar dese xeito o salario a aboar ao persoal contratado.
- Declara que as traballadoras e traballadores, con contratos laborais afectados polo conflito colectivo, teñen dereito a percibir cando menos como salario as contías que figuran no RD 289/2021 tanto nas axudas Margaritas Salas (3.500€ brutos mensuais para quen realicen estancia no estranxeiro e de 2.800€ brutos mensuais para quen o faga dentro do estado) como nas axudas María Zambrano (4.000€ brutos mensuais).
Persoal afectado
O persoal investigador da UVigo afectado pola sentenza gañada pola CIG-Ensino ascende a 38 persoas, dun total das tres universidades que ascende a 136 persoas.
A situación na UDC
Neste momento a CIG-Ensino está á espera de que a sala do social do TSXG que ditou a sentenza que condenou polos mesmos feitos á Universidade da Coruña decida se admite, malia estar presentado fóra de prazo, o recurso presentado pola UDC ou se, tal e como defende a CIG, se desestima e, por tanto, se proclama a firmeza da sentenza. Será nese momento cando solicitará que a UDC pague de oficio todos os atrasos correspondentes sen obrigar ás 33 persoas afectadas a ter que solicitalo individualmente.
En todo caso, o sindicato lamenta que a UDC teña tomada a iniciativa de acudir ao Supremo e insta á UVigo a non seguir ese camiño e acatar a sentenza, estendendo os seus efectos ás 38 persoas afectadas.
