O Tribunal Supremo non admite o recurso da Deputación de Ourense contra anulación do concurso para cubrir 98 empregos

A CIG, que presentou a denuncia, reclama a execución da sentenza
Ourense - 04 Abr 2019

O Tribunal Supremo (TS) vén de emitir un auto no que rexeita o recurso de casación interposto pola Deputación de Ourense contra a sentenza do TSXG que confirmaba unha anterior do Xulgado do contencioso administrativo número 2 de Ourense que anulara a resolución da Presidencia pola que se aprobaron as bases reguladoras e a convocatoria de concurso interno ordinario para a provisión de 98 postos de traballo.

Segundo explican dende a CIG, a anulación do concurso -confirmada polo TSXG e agora polo TS- afecta a ducias de empregos da Relación de Postos de Traballo (RTP), que xa están ocupados por aquelas persoas ás que se lles adxudicaron tras o proceso de concurso invalidado. Lembran que inicialmente a convocatoria de concurso fíxose para 98 empregos, aínda que ao final algúns non foron cubertos. 

Na CIG pregúntanse quen vai asumir a responsabilidade da decisión

Ao mesmo tempo, anuncian que no caso de que non se produza un cumprimento inmediato da sentenza por parte do órgano provincial a central solicitará a súa execución xudicial “para que a situación do persoal da Deputación volva á legalidade”.

Finalmente, pregúntanse quen vai asumir no Goberno da Deputación a responsabilidade “dunha desfeita que ten un alto custe para a cidadanía, que frustra as expectativas dos traballadores/as e que supón botar man de prácticas dirixidas a impedir o desenvolvemento dos principios de mérito e capacidade nas institucións públicas”.