O persoal de Vitrasa suspenderá os paros unha vez que a empresa está disposta a negociar

A concesionaria do transporte urbano do Concello de Vigo convocou o comité a unha xuntanza

Vigo -

O comité de empresa de Vitrasa, concesionaria do transporte urbano do Concello de Vigo, vén de anunciar que suspenderá os paros indefinidos o vindeiro luns 18 despois de que a dirección da compañía convocase a representación do persoal a unha xuntanza, que terá lugar o día 21.

Con todo, dende o comité queren deixar claro que retomarán as mobilizacións -incluíndo unha convocatoria de folga total indefinida- no caso de que as negociacións rematen sen acordo. 

No caso de que non haxa acordo convocarán folga total indefinida

Ao mesmo tempo, anuncian a celebración dunha asemblea o sábado 23 para informar ao conxunto do cadro de persoal sobre o resultado das conversas e dos seguintes pasos a dar no caso de que non se poña fin ao conflito laboral.

Finalmente, dende a representación sindical agradecen o compromiso do persoal de condución coa loita contra o exceso de xornada, para rexeitar os incumprimentos da empresa e en demanda de melloras laborais e animan os traballadores/as a continuar secundando os paros do mesmo xeito que o veñen facendo até o próximo luns 18.

Volver