O persoal de Tyrma mobilízase por uns salarios dignos, máis seguridade e na defensa dos empregos
Traballadores e traballadoras de Tyrma (a empresa de reciclaxe de materiais de plástico que opera dentro da mina de Touro) concentráronse este martes para reclamar un complemento salarial que repare a perda de poder adquisitivo dos últimos anos, mais tamén que se mellore a seguridade laboral, diante do alarmante incremento de accidentes graves que se están producindo.
Con esta protesta, que se desenvolveu coincidindo co cambio de quenda, tamén se queren denunciar os incumprimentos da empresa, que nega os días de permiso retribuídos aos traballadores e traballadoras que corresponden por lei. Canda isto, o comité reclama días de asuntos propios que non teñen recollido no actual convenio.
Xunto a isto, Eduardo Sebio, da executiva comarcal da CIG de Compostela manifesta o rexeitamento da central sindical ás sancións coas que a empresa tenta responsabilizar aos traballadores dos incumprimentos dos protocolos de seguridade por parte da empresa.
Sebio subliña ademais a defensa dos postos de traballo ante a incertidume pola posible reapertura da mina. Son un total de 75 postos de traballo directos que están en xogo de se poñer de novo en marcha a mina.
