O persoal de Linorsa en Ourense esixe a rescisión do contrato coa empresa con protestas diarias no Concello
As traballadoras/es da limpeza dos colexios públicos iniciaron as mobilizacións este martes coincidindo co pleno municipal
As traballadoras/es de Linorsa en Ourense desenvolven concentracións diarias ás portas do Concello para reclamarlle ao Goberno local que rescinda o contrato coa empresa concesionaria da limpeza dos colexios públicos, que lles adebeda tres meses de salario. O cadro de persoal da compañía iniciou este martes as mobilizacións ás portas do consitorio coincidindo coa celebración do pleno da corporación municipal.
Segundo explican dende a Unión Comarcal da CIG de Ourense, as mobilizacións desenvólvense todos os días de 11.00 a 12.00 horas para forzar ao Concello a rescindir o contrato con Linorsa, que adebeda tres mensualidades ao seu cadro de persoal, e a sacar de novo a concurso a concesión.
As traballadoras/es iniciaron o calendario de protestas este martes, coincidindo coa celebración do pleno da corporación municipal, e manteranas ao longo desta semana e da que vén. Durante as mobilizacións, convocadas polo comité de empresa (CIG, CCOO e UGT), as afectadas/os despregan unha faixa na que se pode ler “Linorsa paga o que debes” e berran consignas denunciando a súa situación.
