O persoal de Betanzos HB e da auxiliar Masa concéntrase en memoria do compañeiro falecido e para esixir máis seguridade na fábrica
Pon o foco nos dereitos salariais roubados desde 2010 que impiden facer fronte á suba do custo da vivenda, do gasto enerxético ou da cesta da compra
Un grupo de traballadores e traballadoras de Betanzos HB, así como da empresa auxiliar Masa, concentráronse este venres ás 17:30 horas ás portas da fábrica para lembrar o compañeiro que perdeu a vida no accidente laboral ocorrido o pasado luns, 5 de outubro, e reclamar máis seguridade nas instalacións.
A concentración quixo ser unha mostra de lembranza e respecto cara ao compañeiro falecido, así como de solidariedade coa súa familia, amizades e persoas achegadas, nun momento de profunda dor para o conxunto do persoal.
Ao mesmo tempo, a mobilización serviu para poñer o foco na necesidade de garantir unhas condicións de traballo seguras para todas as persoas que desenvolven a súa actividade na fábrica, tanto o persoal da empresa principal como o das empresas auxiliares que traballan nas instalacións.
As persoas traballadoras reclaman que a seguridade e a saúde laboral sexan unha prioridade real, por enriba de calquera outra consideración, e que se adopten as medidas necesarias para evitar que unha traxedia como esta volva repetirse.
A concentración concluíu coa reivindicación de máis seguridade na fábrica e co recordo do compañeiro falecido, nunha xornada na que o persoal quixo deixar claro que traballar non pode custar a vida.