O Movemento Galego da Saúde Mental e SOS Sanidade piden un plan galego de prevención do suicidio con actos en varias localidades
Os colectivos lembran que en Galiza morre por suicidio unha persoa cada día, realidade que se agravou dende o comezo da crise, alcanzando no ano 2014 o seu teito con 394 mortes por esta causa.
Denuncian que as políticas desenvolvidas polo Goberno central e pola Xunta fronte á crise desprotexeron a sectores sociais vulnerables, incrementando o risco de suicidio na sociedade. “Desas políticas cómpre destacar como especialmente importantes a carencia de políticas activas de emprego e un elevadísimo paro prolongado; a redución da protección social; o deterioro da sanidade pública, e en particular o debilitamento da Atención Primaria; e a tolerancia gobernamental coa banca e a súa agresividade respecto ao cobro dos préstamos hipotecarios, coa conseguinte vaga de desafiuzamentos”, enumeran.
Con todo, lembran que o noso país padeceu dende sempre elevadas taxas de suicidio. “Sofre un grave problema de saúde pública tal como o define a Organización Mundial da Saúde (OMS). Só agora, cando este estado de cousas se ve agravado pola crise nos decatamos de que convivimos impasibles cunha realidade intolerable”. Neste senso, critican que os gobernos non só non fixeron nada contra isto, senón que mesmo negaron as cifras das propias institucións oficiais, “chegando no caso da Xunta do PP a rexeitar no Parlamento galego nesta lexislatura (até en tres ocasións) iniciativas realizadas pola oposición propoñendo elaborar o plan de prevención”.
Segundo explican, as recomendación da OMS comezan por afirmar que o suicidio pode previrse eficazmente e rematan por presentar o obxectivo de reducir en cada país nun 10% para o ano 2020 o número de mortes por esta causa. Ao tempo, chama aos Gobernos a liderar e a desenvolver plans de prevención do suicidio.
“Sobre esta base, o Movemento Galego da Saúde Mental, respostando a ese mandato e cumprindo co noso compromiso fundacional, iniciamos o pasado 3 de maio a campaña 'Badaladas pola prevención do suicidio', coa finalidade de sensibilizar á sociedade fronte a esta cuestión, e para reclamar o cumprimento das obrigas que os nosos gobernantes teñen coa protección da saúde e da vida da poboación”. Por iso esixen que con urxencia a elaboración dun Plan Galego de Saúde Mental e a creación dunha comisión técnica “capaz e crible” que teña carácter multisectorial.
