O modelo de dirección de GADIS condenado en firme pola Audiencia Provincial da Coruña
A Audiencia Provincial da Coruña, nunha sentenza que xa é firme e definitiva, desestima completamente as xustificacións coas que Gadis pretendía agochar a súa culpabilidade e condena á antiga encargada do establecemento de Melide a 20 meses de prisión e ao pago dunha indemnización de 51.000 euros por catro delitos de acoso no ámbito laboral e de lesións psíquicas.
Porén, malia a vitoria xudicial, representantes da CIG e as traballadoras vítimas de acoso compareceron esta mañá en rolda de prensa para denunciar a pasividade de Gadis, que mantén á condenada na empresa e non adoptou medidas para reparar o dano causado.
Por iso Marcelino Varela, delegado da CIG en Gadis incidiu en que “esta sentenza non é só contra unha persoa, senón contra un modelo de dirección baseado no acoso e na impunidade, tolerado por Gadis”.
Varela subliñou que a empresa “soubo do problema antes das denuncias e nada fixo” e asegurou que durante o proceso, Gadis “intentou desacreditar ás vítimas e até ameazou á CIG”. Lamentou, por iso, que agora, coa sentenza firme, Gadis siga calado. Unha actitude que cualificou de “inmoral”.
Nese sentido María José Balboa, unha das vítimas, explicou que “hoxe é un día de vitoria, pero tamén de indignación. Sufrimos moito e, aínda así, Gadis non asumiu a súa responsabilidade. A condenada segue no seu posto e iso é inaceptable”.
Unha indignación que tamén expresou Cristina Ramos, a outra compañeira afectada, que, malia isto, manifestou que “estamos orgullosas de que, por fin, se fixera xustiza” e animou para que “esta caso sirva para que ninguén máis teña que calar”.
Sentenza firme
Segundo explica Roberto Pérez, secretario comarcal da CIG-Servizos da Coruña, a Audiencia Provincial insiste na falta de interese de GADIS para que estas situacións de acoso laboral por parte de algúns mandos desapareza e na ausencia de medidas efectivas que erradiquen os estilos de dirección déspotas e autoritarios.
Textualmente afirma que Gadis “non adoptou as medidas idóneas para evitar episodios graves, como os que finalmente se produciron. As accións levadas a cabo pola empresa non foron idóneas, nin efectivas para evitar o risco claramente posto de manifesto de que se produciran consecuencias graves para as traballadoras afectadas pola conduta da acusada, como finalmente sucedeu”.
Pérez denuncia ademais que a dirección de GADISA defendeu até as últimas consecuencias a actitude hostil e de acoso laboral por parte da encargada denunciada. “Despois da primeira sentenza, incluso ameazou nalgunha reunión con que ía denunciar por difamación a CIG”, dixo e cuestionou a actitude da empresa porque “en ningún momento buscaron unha solución e esgotaron as vías xurídicas para eludir a súa responsabilidade”.
Plan contra o acoso laboral
O secretario da CIG-Servizos da Coruña denunciou ademais que hoxe en día “continúan sen aplicar ningunha decisión para protexer ás persoas traballadoras desta clase de situacións” e concluíu asegurando que ·Gadis é responsable do acoso laboral que se sofre nalgunha das tendas".
Por iso exixiu unha desculpa pública por parte da empresa, a separación inmediata da condenada do posto de traballo e un plan contra o acoso laboral, negociado co comité e coa participación do sindicato.
Anunciou que a CIG porá en marcha todas as accións legais e mobilizacións necesarias para garantir que Gadis asume a súa responsabilidade e concluíu afirmando que “non admitiremos que ignoren esta sentenza ou que se repitan os abusos”.
