O comité dos centros socioculturais de Santiago denuncia “abandono institucional” e exixe a municipalización
O Comité de Empresa dos Centros Socioculturais de Santiago concentrouse este xoves, 24 de abril, diante do Pazo de Raxoi durante o pleno municipal para denunciar a "situación de abandono" á que está abocada a Rede de Centros Socioculturais, sen solucións á vista. O persoal alerta dunha crise agravada desde febreiro, cando a empresa dos Lotes I e IV (Serviplus) anunciou a súa marcha prematura, deixando o servizo nunha situación "cada vez máis inestable".
O Comité denuncia múltiples problemas persistentes, como o "retraso continuado no pagamento das nóminas", a "falta de material para a realización de actividades", a "falta de cobertura de persoal" e a "falta de información por parte da empresa". A pesar de catro solicitudes de audiencia coa alcaldesa, Goretti Sanmartín, desde febreiro, só a última recibiu resposta, sen que se axendase unha xuntanza que consideran "fundamental nun momento de máxima tensión laboral".
A incerteza crece ante o atraso na publicación dos pregos do servizo, que debían estar listos hai máis dun ano. O Comité pregunta se "non se quere recoñecer como válido o convenio do servizo" tal e como se contempla en sentenza xudicial tras unha demanda de conflito colectivo da CIG. Mentres, a empresa Nor’integran, responsable das conserxerías, anunciou o 24 de abril o fin do seu vínculo laboral o 30 de xuño, implicando o "peche completo" dos centros dependentes destas conserxerías e o despido de 14 traballadoras, 9 delas con diversidade funcional.
Futuro incerto
O futuro do servizo é unha "incógnita", con interrogantes sobre os pregos e o persoal a partir de xuño. O Comité advirte que "que ten previsto este concello para salvar a situación se en xullo, sen contrato adxudicado, as empresas abandonan o servizo" segue sen resposta. Xa se confirmou a cancelación da conciliación de verán, un "servizo social indispensable" para familias con poucos recursos, que afectará gravemente a unha plantilla maioritariamente fixa-discontinua, dependente dos campamentos de xullo. O persoal teme un "ERTE, o peche de varios centros e un convulso inicio do curso".
Farto de "20 anos de maltrato, abandono institucional e precariedade laboral", o Comité esixe a "municipalización do servizo" como única solución. Declaran que "non queremos máis pregos, nin cambios de empresa, nin xornadas precarias; queremos respecto e dignidade, unhas condicións dignas e unha xestión directa da Rede de Centros Socioculturais". A representación sindical cuestiona á alcaldesa, preguntando "a que espera para recibirnos, señora Sanmartín".
O Comité chama á cidadanía e ás institucións a apoiar a loita por un servizo público de calidade en Galiza, comprometéndose a seguir mobilizándose para garantir a dignidade laboral e a continuidade dos centros socioculturais.
