![Confederación Intersinidical Galega](/assets/cig/2022/logos/cig.png)
O comité do Hotel Porta do Camiño inicia mobilizacións tras do despedimento de dúas compañeiras
![](assets/images/f/2020-02-06%20concentracion%20Porta%20do%20Cami%C3%B1o%20001-70af74ff.jpg)
Esta mañá iniciáronse as mobilizacións diante do hotel Porta do Camiño, en San Lázaro, convocadas polo comité de empresa, para demandar a readmisión de dúas compañeiras do departamento de pisos por denunciar a súa situación laboral. O despedimento producíuse no mes de decembro e malia demandar, en varias xuntanzas, a súa readmisión, a dirección négase a readmitilas.
![](imaxes/adaptadas/780/files/novas/2020/02/06/Concentracion%20Hotel%20Porta%20do%20Camino/2020-02-06%20concentracion%20Porta%20do%20Cami%C3%B1o%20002.jpg)
O comité de empresa ten denunciado, de forma reiterada, a situación de sobrecarga de traballo que hai neste departamento así como a actitude despótica da gobernanta. Mesmo chegou a facer entrega dun escrito con sinaturas das traballadoras deste departamento, así como doutras que xa non están na empresa, denunciando a actitude da gobernanta cara elas.
Trátase dun departamento con moitísima rotación de persoal, a diferenza dos outros, que contan cun cadro de persoal estable.
O comité salienta a situación de precariedade e sobre explotación que sofre o departamento de pisos no sector de hostalería.
![](imaxes/adaptadas/780/files/novas/2020/02/06/Concentracion%20Hotel%20Porta%20do%20Camino/2020-02-06%20concentracion%20Porta%20do%20Cami%C3%B1o%20003.jpg)
O comité manifesta ademais que lamenta profundamente a actitude da Dirección que é, segundo explican, a que os aboca a iniciar mobilizacións para denunciar publicamente a situación en particular destas dúas compañeiras despedidas e deste departamento en xeral sendo uns dos máis precarizados do sector.