![Confederación Intersinidical Galega](/assets/cig/2022/logos/cig.png)
O comité de Vitrasa rexeita a oferta de convenio da empresa ao supoñer unha importante perda salarial
![](files/novas/2024/08/28/Recurso_Vitrasa.jpg)
O comité de empresa de Vitrasa, concesionaria do servizo de transporte urbano do Concello de Vigo, rexeita a proposta de convenio achegada pola empresa so supoñer unha importante perda de poder adquisitivo, xa que a dirección négase a actualizar os soldos dos anos 2021, 2022 e 2023 e ofrece unha suba cativa para 2024, 2025, 2026 e 2027.
Segundo explican dende a representación do cadro de persoal, na reunión de convenio que tivo lugar onte a compañía volveu poñer de manifesto que a pesar do reequilibrio de 12 millóns de euros aprobado xa polo Goberno local -e dos 6 millóns recibidos anteriormente- non está disposta a actualizar os soldos dos anos 2021, 2022 e 2023. “Isto suporá unha perda de poder adquisitivo de máis dun 14% para o conxunto dos traballadores/as”.
Vitrasa realizou unha oferta para os anos sucesivos (2024, 2025, 2026 e 2027) que en teoría supera a previsión dous IPC futuros, pero sen ningunha cláusula que permita a súa revisión en caso de superarse esas previsións. “De xeito que se se cumpren as previsións o persoal perdería un 8,9% de poder adquisitivo; ademais, a oferta non inclúe cláusula de revisión salarial, polo que no caso de que os IPC fosen superiores seguiriamos aumentando a perda de poder adquisitivo”.
Ao mesmo tempo, as melloras nas condicións sociais son practicamente inexistentes, empeorando notablemente as actuais nalgúns casos, polo que a resposta do comité foi un rexeitamento unánime á proposta. “Aínda así, desde a representación dúas traballadores/as vemos un pequeno avance, polo que imos realizar unha revisión a fondo da proposta e enviaremos unha resposta á empresa que agardamos sexa aceptada para poder evitar futuros conflitos”.
Oferta económica da empresa
2024: 3,2% (a previsión do IPC é do 3,1%).
2025: 3,5% (a previsión do IPC é do 2,2%).
2026: 4% (a previsión do IPC é do 2,2%).
2027: 4% (a previsión do IPC é do 2,1%).