![Confederación Intersinidical Galega](/assets/cig/2022/logos/cig.png)
O comité de folga empraza a Xunta a reflexionar e retomar a negociación para rematar o conflito de Xustiza
![](assets/images/1/2018-04-20%20concentracion%20Xustiza%20Compostela%20001-ca589201.jpg)
O comité de folga de Xustiza fai un chamamento á Xunta para que reflexione e sente a negociar con vontade de rematar co conflito. Así o explicou este venres Oscar Freixedo, representante da CIG-Xustiza nas mesas de negociación, no decurso dunha concentración diante do Pazo de Congresos de Compostela, onde o Presidente da Xunta inauguraba Edudixital.
Freixido asegurou ademais que “as forzas se manteñen intactas” e “a unidade de acción sindical” fronte á administración que “se levantou da mesa por unha diferenza de 12 euros”.
A este respecto o representante da CIG-Xustiza indicou que tamén se mantén a contra oferta que se lle fixo no último momento á Xunta, presentada “por acordo unánime do comité de folga” e vixente naquel momento. Por iso insistiu en que “cando queira a administración retomar as negociacións así se fará e por parte do comité estamos en total disposición de continuar no punto no que se quedou”.
![](imaxes/adaptadas/780/files/novas/2018/04/20/Xustiza/2018-04-20%20concentracion%20Xustiza%20Vigo%20001.jpg)
Ao tempo que se celebraba en Compostela esta concentración, persoal de Xustiza se concentraba diante da sede do Partido Popular na Rúa de Príncipe en Vigo.
Proposta do comité de folga
A proposta trasladada polo comité de folga flexibilizaba as demandas económicas ao contemplar unha suba lineal de 140€ en tres anos (da que se aplicaría un incremento do 60% para este ano e do 20% para 2019 e 2020).
Ao tempo estabelece unha cláusula de revisión salarial, "que garantiría que as retribucións do persoal de xustiza de Galiza estean sempre no posto cuarto da táboa comparativa coas outras comunidades e que permitiría que cada ano nos vaiamos aproximando ao terceiro posto", explica Óscar Freixedo, representante da CIG-Xustiza nas mesas de negociación.
Xunto a isto, tamén se contempla un plan de recuperación do traballo perdido.
Esta proposta presentouse en resposta á segunda oferta formulada pola Xunta na última xuntanza, que suporía unha suba de 140€ na categoría de forenses; 135€ para xestores/as; 127€ tramitadores; e de 122€ para auxilios. Aplicaríanse en tres anualidades: o 50€ para 2018, o 30€ para o seguinte ano e o 20€ para 2020).