O colonialismo israelí, variante do occidental
Mesmo despois dun século de loita inquebrantábel pola liberdade, o mundo occidental permanece impasíbel ante o sufrimento dos palestinos polo colonialismo sionista de colonos, apoiado polos europeos. No seu lugar, os dirixentes e os medios de comunicación occidentais pídenlles que se condenen a si mesmos e á súa procura da liberación
Hoxe en día é evidente en Occidente que a afiliación política de cada un apenas marca diferenzas cando se trata de Palestina e da loita palestina. Líderes, políticos, expertos e figuras dos medios de comunicación de todo o espectro político, incluíndo a dereita, os conservadores, os liberais, o centro e boa parte da esquerda, prestaron o seu apoio ao réxime israelí de colonos-colonialistas e de apartheid.
Para comprendermos realmente este afundimento moral, é esencial situar esta resposta colectiva occidental nun contexto máis amplo. O mundo occidental está a lidar cun importante «colapso mental» por mor da actual redistribución mundial do poder, que se está a afastar da esfera euroamericana. Esta resposta é bastante comprensíbel porque renunciar a privilexios coloniais seculares e á licenza para dominar nacións non europeas e o mundo é un reto innegábel.
Na actualidade, a clase dirixente occidental e os seus principais medios de comunicación volveron aos fundamentos eurocoloniais e racistas que apontoaron a licenza para invadir, colonizar e cometer xenocidio nas Américas e noutros lugares do mundo desde 1492.
Empregan unha inquietante variedade de linguaxe racista e deshumanizadora para vilipendiar os palestinos e deslexitimar a súa loita, cualificándoos de «bestas», «animais», «bárbaros», «terroristas», «malvados», «salvaxes», que están a cometer un «segundo holocausto» e «outro 11-S», etc.
Este discurso reflicte fielmente os mesmos temas e patróns que os coñecidos filósofos, pensadores, figuras fundadoras e heroes liberais e da Ilustración de Europa utilizaron para xustificar o asoballamento e colonización de nacións non europeas en todo o mundo durante os últimos cinco séculos.
Non é de estrañar que a postura oficial occidental abrace sen reservas a narrativa colonial dos colonos israelís, que é esencialmente unha imitación do discurso euro-moderno/colonial orixinal.
O estándar colonial occidental
Moitos condenan con razón a hipocrisía e a parcialidade expresadas nos principais medios de comunicación e discursos políticos occidentais.
Resulta sorprendente que os mesmos medios e líderes occidentais que acusan sen reparos (e sen datos) a Rusia de cometer crimes de guerra e crimes contra a humanidade se absteñan sistematicamente de facer o mesmo cando se trata de Israel.
Ignoraron os crimes de Israel contra Palestina desde 1948, incluídos os continuos crimes de apartheid e limpeza étnica de palestinos, que converteron en refuxiados ou desprazados internos a preto do 80 por cento da poboación palestina.
Década tras década de castigos colectivos israelís aos palestinos, como o bombardeo das súas infraestruturas civís, vivendas, hospitais, lugares de culto, escolas e universidades, así como o secuestro e a queima dos seus nenos até a morte, o corte do fornecemento de electricidade e auga e moitos outros crimes apenas provocaron a preocupación e indignación de Occidente.
E o que é aínda máis desacougante, os mesmos políticos e figuras mediáticas que apoiaron a orde de detención da Corte Penal Internacional (CPI) contra o presidente ruso obstruíron activamente a investigación da CPI sobre os crimes de Israel para negar ás vítimas palestinas un mínimo de xustiza.
Paradoxalmente, aínda que isto pareza hipocrisía e dobre vara de medir, o Occidente oficial e o seu discurso e accións mediáticas seguen a ser totalmente coherentes coas normas euro-modernas/coloniais, que xa determinaron que só os europeos son considerados plenamente humanos e, por tanto, teñen dereito á liberdade e ao dominio sobre os demais.
Deshumanización
A actual deshumanización dos palestinos, así como doutros pobos asoballados e racializados de todo o mundo, representa unha continuación das normas e estándares coloniais europeos profundamente arraigados.
Acusar de hipocrisía os gobernos e medios de comunicación occidentais leva implícito unha esperanza de redención. Aínda que esta esperanza é certamente xenuína, é, por desgraza, unha esperanza inalcanzábel.
Como observou sagazmente o pensador anticolonialista e revolucionario afrocaribeño Frantz Fanon, as vítimas do colonialismo nunca conseguirán persuadir os seus colonizadores europeos do seu sufrimento e do seu profundo desexo de liberdade porque, na mentalidade eurocolonial, só os identificados como europeos son vistos como capaces de experimentar o verdadeiro sufrimento e o anhelo de liberdade.
Mesmo despois dun século de loita inquebrantábel pola liberdade, o mundo occidental permanece impasíbel ante o sufrimento dos palestinos polo colonialismo sionista de colonos, apoiado polos europeos. No seu lugar, os dirixentes e os medios de comunicación occidentais pídenlles que se condenen a si mesmos e á súa procura da liberación.
O Occidente oficial e os medios de comunicación non só ignoran o sufrimento palestino e finxen que o conflito comezou a semana pasada, senón que, como observou acertadamente Edward Said hai case catro décadas, desestiman o seu dereito a narrar e contar a súa propia historia.
Teiman en presentar os palestinos como os máximos culpábeis, violadores e terroristas, malia as abundantes probas pola contra. O seu sufrimento baixo un réxime de apartheid foi retransmitido en directo por televisión e nas redes sociais, e documentado por numerosas investigacións e resolucións da ONU, informes, comités, estatísticas, infografías, así como pola investigación académica, baseada en probas e de arquivo realizada por estimados historiadores.
Castigo colectivo
O discurso oficial occidental está deseñado para manipular a opinión pública a favor do castigo colectivo e o asasinato dos palestinos, non só por parte dos seus inmediatos colonizadores israelís, senón tamén por parte das potencias coloniais estadounidenses, británicas, alemás e outras que enviaron rapidamente os seus portaavións e armamento para disciplinar e castigar as vítimas en Gaza.
Hoxe en día, somos testemuñas do despregamento dos mesmos tópicos racistas do discurso colonial europeo para deshumanizar os palestinos e negarlles o dereito a loitar pola descolonización.
O seu suposto crime non reside nas súas accións, senón na súa firme determinación de existir na súa terra, resistir e buscar a liberdade. O crime dos palestinos é que seguen a reaparecer, negándose a morrer en silencio e finalmente romper o valo da asediada Gaza.
Independentemente de que esta loita adopte unha forma violenta ou non violenta, ambas lexítimas en virtude do dereito internacional, inevitabelmente se cualifica de violenta, xa que desafía o marco de xustiza estabelecido polos colonos euroisraelís e os seus fundamentos esencialmente violentos, inxustos e inmorais.
Desde esta perspectiva colonial, a simple existencia dos palestinos considérase un acto de violencia e unha transgresión. O Occidente oficial xa se embarcou na criminalización e prohibición de accións pacíficas como protestas e boicots contra o apartheid israelí, a agresión colonial dos colonos, a limpeza étnica, o castigo colectivo, os asaltos a lugares sacros musulmáns e cristiáns, a transformación de Gaza nun campo de concentración ao aire libre para máis de dous millóns de persoas (das cales 1,7 millóns son refuxiadas), o control da súa inxesta calórica, por mencionar só algúns exemplos.
O colapso mental do stablishment occidental chegou a un punto no que mesmo exhibir a bandeira palestina ou levar o keffiyeh palestino se considera un acto de violencia.
Do mesmo xeito que outras poboacións colonizadas e escravizadas ao longo da historia, os palestinos loitan por un futuro libre da opresión colonial. Como sinalou hai máis de século e medio o famoso abolicionista e antigo escravo negro dos colonos e amos europeos nos Estados Unidosd, Frederick Douglass, o progreso nunca se consegue sen loita, xa que «o poder non concede nada sen unha esixencia». Nunca o fixo e nunca o fará».
O pobo palestino, como outras nacións colonizadas antes ca el, persistirá na súa loita pola liberdade, mesmo cando o peso da opresión apenas lle permita respirar.
[Artigo tirado do sitio web La Haine, do 25 de outubro de 2023]