O ano 2025 rematou en Galiza con perda de emprego e cun avance da precariedade laboral
Galiza rematou o ano 2025 cun incremento do paro e coa consolidación do avance da precariedade laboral como consecuencia da parcialización do emprego e dos baixos salarios. O mes de decembro rexistrou 459 persoas paradas máis con respecto a novembro, o que eleva a 112.031 as persoas desempregadas.
Para o secretario confederal de Negociación Colectiva, Emprego e Industria da CIG, Paco Sío, os datos do paro feitos públicos hoxe polo Servizo Público de Emprego Estatal (SEPE) “evidencian unha vez a problemática do avance da precariedade e do modelo económico do PP en Galiza, baseado na promoción do sector servizos fronte a outras actividades con mellores condicións laborais, como a industria, que rexistrou a maior perda de postos de traballo neste período”.
De feito, dos 54.700 contratos subscritos no noso país neste período, 40.680 foron temporais, e moitos deles a través de ETT, “xa que se está a producir un fomento da contratación a través deste tipo de empresas, sobre todo entre a xente moza e as mulleres, que son os colectivos máis padecen o aumento da pobreza laboral”.
Os datos da afiliación á Seguridade Social amosan un medre en sectores como almacenamento e en actividades inmobiliarias, artísticas ou de entretemento, ademais de na agricultura, caracterizadas pola parcialidade, con peores condicións laborais e con menos estabilidade no emprego. “Isto fai que a xente moza altamente cualificada non vexa colmadas as súas expectativas nestes sectores, que son ocupados maioritariamente por persoas estranxeiras. O que provoca un efecto de substitución, porque a xente nova galega emigra en busca de mellores condicións mentres recibimos persoas migrantes que aceptan estes postos de traballo en situación de precariedade”.
O 17,5% das persoas afiliadas á Seguridade Social son a tempo parcial, ao que hai que sumarlle case un 4% de contratos fixos descontinuos. De xeito que arredor dun 22% das persoas afiliadas non traballan ou todos os días ou todas as horas, “polo que carecen dun salario digno co que poder facerlle fronte á carestía da vida”. Por iso a pesar do incremento interanual do emprego e das afiliacións á Seguridade Social, cada vez hai máis traballo parcializado e peores salarios, o que está a provocar un aumento da emigración das persoas con alta cualificación. “Non falta man de obra como moitas veces di a patronal, o que falta é patronal cualificada que sexa quen de crear emprego en sectores con mellores condicións laborais”.
