Masiva manifestación en Boiro contra a campaña de acoso laboral en AMICOS
Lección de dignidade e de valentía a que o pasado mércores, día 26 de marzo, se viviu nas rúas de Boiro, protagonizada polas delegadas da CIG, traballadoras de AMICOS, familiares de persoal e ex persoal e veciñanza da comarca.
A manifestación contou ademais coa presenza dunha ampla representación de máis de 20 traballadoras e traballadores que no último ano e medio tiveron que abandonar AMICOS, ou ben por despidos inxustificados ou ben causando baixa voluntaria “por non poder aguantar máis o terror que se vive alí dentro”.
Este apoio demostra, en palabras do secretario comarcal da CIG, Rubén Monteagudo, “que por fin se está rachando o muro de silencio que hai arredor do que pasa en Amicos, que quere escravas e non traballadoras na súa empresa e que se aproveita de que a súa función é atender persoas con diversidade para vulnerar os dereitos laborais do seu persoal”.
Neste sentido quixo mandar unha mensaxe de tranquilidade ás familias de usuarios e usuarias. “Esta loita tamén é por vós, para que haxa unha mellor atención e non siga acontecendo que cada poucos meses ou mesmo cada mes cambie a persoa que se encarga do familiar que acode a AMICOS”.
Precisamente, a delegada da CIG, Tessi Romero, tomou a palabra para ler un por un o nome das 20 persoas que foron despedidas inxustamente no último ano e medio con falsidades e acusacións graves que despois nunca quedan en nada e rematan no SMAC ou nos xulgados co recoñecemento de que foron despedimentos improcedentes.
Tamén enumerou as 18 persoas que no mesmo período marcharon da empresa “por non aguantar máis o que alí se vivía”. A situación de acoso foi corroborada por unha ex traballadora que interveu ao final da manifestación. “Por moito que te esforces día a día no teu posto de traballo e por moito que deas o 200%, cando empezas a alzar un pouco a voz ou saes do redil que teñen marcado atopas unha carta de despedido chea de mentiras e inxurias”, indicou.
Rubén Monteagudo lembrou que este conflito comezou “simplemente” porque as traballadoras de AMICOS se dirixiron á CIG para organizarse sindicalmente para reivindicar que se cumpra o convenio. “Ese é o seu único delito”.
Así mesmo, insistiu en que “nada vai facer que calemos. Mentres a dirección de Amicos ameace, sancione, amoneste, reprima e despida inxustamente aquí nos terá enfronte. Defenderemos coa mesma firmeza e enteireza os dereitos laborais ao igual que o fan as nosas delegadas, inxuriadas e acosadas persoalmente como lle acontece a Sandra Sevilla, contra quen se orquestrou unha campaña de escritos difamatorios promovida pola propia dirección da empresa co apoio do presidente do comité”.
En relación con este feito, Monteagudo lanzou unha pregunta dirixida á dirección comarcal e nacional de UGT. “Están de acordo os e as responsábeis deste sindicato coa forma de actuar do presidente do comité de empresa e restantes membros de UGT que participan xunto coa dirección nesta campaña de acoso, pechando nun despacho a traballadoras para que asinen escritos contra Sandra Sevilla e contra a CIG, ou defendendo a empresa en sentenzas gañadas por ex traballadores como foi o c.aso de Alejandro acusado inxustamente de neglixencia por desatención dun usuario? Temos claro que en AMICOS hai un sindicato que naceu das traballadoras e outro que naceu dos despachos da dirección. E seguiremos traballando sen eles ata que recapaciten. Encontrarannos sempre na defensa das traballadoras”, concluíu.
