Máis de 200 pacientes da Mariña foron derivados ao servizo de rehabilitación do Polusa dende novembro

Burela - 27 Abr 2023

A CIG-Saúde da Mariña denuncia que máis de 200 pacientes da comarca foron derivados, dende o mes de novembro de 2022, ao servizo de rehabilitación do POLUSA, "obrigando deste xeito aos mariñaos e mariñás a que teñan que desprazarse até a Lugo para beneficio, ademais, da sanidade privada".

Para a CIG-Saúde esta práctica supón unha privatización encuberta dos servizos sanitarios que se deberan prestar no sistema público, pois a maiores, despois dos/as pacientes seren valorados/as en rehabilitación do hospital privado, son derivados para tratamento de fisioterapia “non na sanidade pública de Mariña, senón directamente a clínicas privadas, unha en Viveiro, outra en Foz e outra en Ribadeo”.

Consecuencias de non ter área sanitaria propia

Subliñan que non ter unha área sanitaria propia "implica non contar co poder de decisión e co orzamento propio para manter os servizos na comarca, os cales se destinarán a aumentalo nos grandes hospitais e na sanidade privada". Lembran que a supresión da área sanitaria foi unha decisión política "co obxectivo de desmantelar unha sanidade próxima a nós, nunha comarca cunha dispersión xeográfica como a nosa".

A CIG-Saúde da Mariña lembra que o 30 de agosto de 2017 José Manuel Balseiro explicou que a reforma da Lei de Saúde e a supresión da Área Sanitaria da Mariña, lonxe de debilitar a atención, permitiría seguir ampliando a oferta de recursos cunha atención máis próxima, “algo que no día a día vemos que é unha mentira máis do Partido Popular”.

Xunto a isto apuntan que o 6 de setembro de 2017, o anterior Conselleiro de Sanidade afirmaba que con esta reforma sanitaria “avanzaríamos” nun maior número de actividades que se poidan levar a cabo na Mariña evitando dese xeito os desprazamentos dos cidadáns, "algo que se confirma como unha nova mentira do Partido Popular".

 Plan urxente de mellora da rehabilitación e fisioterapia na comarca

O sindicato nacionalista exixe explicacións á dirección do Hospital da Mariña e un plan urxente de mellora da rehabilitación e fisioterapia na comarca. “Cómpre abordar o abandono da rehabilitación e fisioterapia, erradicar as listas de espera e dar solución á situación das persoas derivadas polo SERGAS”, aseveran.

Para conseguir este obxectivo, a CIG Saúde reclama entre outras medidas:

  • Ampliación e renovación do servizo de rehabilitación do hospital da Mariña, con máis espazo, máis recursos humanos e renovación dos recursos materiais. Dotar o hospital de dous médicos/as rehabilitadores, xa que na actualidade só hai un para unha poboación de máis de 70.000 habitantes.
  • Habilitar fisioterapia no centro de saúde de Burela, inexistente a día de hoxe. Esta carencia coloca nunha situación de desigualdade as/os pacientes de Burela respecto doutros concellos, xa que as e os médicos de familia de Burela non poden prescribir rehabilitación nos casos que establecen os protocolos SERGAS, coma nos outros centros de saúde. Este feito provoca a saturación do servizo de rehabilitación do Hospital da Mariña ao ser o centro de referencia para as veciñas e veciños de Burela.
  • Habilitar fisioterapia no centro de saúde de Ribadeo pola tarde.
  • Habilitar fisioterapia no centro de saúde de Mondoñedo pola tarde.
  • Fisioterapia respiratoria infantil na Mariña, sen ter que desprazarse a Lugo.
  • 2 fisioterapeutas máis no centro de saúde de Foz, 1 máis de mañá e 1 máis de tarde.

Dende CIG-Saúde da Mariña tamén esixen coñecer os cartos derivados á sanidade privada para fisioterapia e rehabilitación, solicitan que o servizo sexa 100% público (o único que garante calidade e equidade) e a contratación de máis persoal cos cartos inxectados de forma encuberta para favorecer a sanidade privada.