“Golpe de estado” da patronal estatal aos dereitos do persoal da construción da provincia de Pontevedra

A CIG denuncia que a anulación do convenio da construción da provincia de Pontevedra por parte do TSXG tras a demanda presentada pola patronal estatal supón “un auténtico golpe de estado” contra os dereitos do persoal do sector e censura que o empresariado pretenda impoñer, coa complicidade de CCOO e UGT, un marco estatal que empeora as condicións laborais.

Na central lamentan que tanto a patronal estatal como os sindicatos CCOO e UGT estean na dinámica de boicotear as melloras que se acadan no noso país, intentando impoñer o que se pacta en Madrid aínda que supoña unhas condicións miserentas que empobrecen o persoal do sector. 

“Agora celebran esta decisión xudicial aínda que as persoas traballadoras non vexan aumentados os seus salarios nin poidan gozar das melloras pactadas”, tal e como sinala o secretario nacional da CIG-Construción, Plácido Valencia, que considera “escandaloso” que CCOO e UGT fagan apoloxía do empeoramento das condicións de traballo. “Emprazámolos a tomar as medidas necesarias, incluída a folga, para defender as melloras e os dereitos que contempla o convenio de Pontevedra e que a patronal de Madrid non respecta e anula”.

O acordo, que entrou en vigor o 9 de xuño tras ser asinado pola CIG e a asociación empresarial do sector, incorporaba unha serie de melloras laborais, incluíndo a reivindicación histórica da xornada intensiva de mañá no verán durante o mes de xullo. Mais tamén o complemento de IT por enfermidade común e o de discapacidade, as licenzas e as indemnizacións por despido no sector de conservación de estradas e vías férreas. Ademais, establecía unha suba do 4,75% en 2022 e do 3% en 2023, con cláusula de revisión salarial a IPC.

Despois da ratificación do convenio a patronal estatal, en contra da provincial, presentaba recurso xudicial contra o convenio, como acontecera hai cinco anos co anterior acordo. A CIG non puido participar no xuízo ao non terlle chegado a tempo a notificación.